អង់គ្លេស ៖ អ្នកកាន់ទុក្ខប្រហែល ១០០ នាក់ ដែលភាគច្រើនជាជនជាតិរុស្សីនិរទេសខ្លួន កាលពីថ្ងៃសុក្រ បានទប់ទល់ទៅនឹងអាកាសធាតុត្រជាក់ខ្លាំង និងមានភ្លៀង ដើម្បីមកប្រមូលផ្តុំគ្នាគោរពវិញ្ញាណក្ខន្ធ ដល់មេដឹកនាំប្រឆាំងរុស្ស៊ី លោក Alexei Navalny នៅទល់មុខស្ថានទូតរុស្ស៊ីក្នុងទីក្រុងឡុងដ៍្រ។ លោក Navalny បានស្លាប់នៅក្នុងជំរំពន្ធនាគាររុស្ស៊ី ត្រូវបានបញ្ចុះនៅទីក្រុងមូស្គូ កាលពីថ្ងៃសុក្រ។

ជាមួយគ្នានេះ នៅទីក្រុងប៉ារីស ប្រទេសបារំាង អ្នកគាំទ្ររាប់សិបនាក់របស់លោក Alexei Navalny បានប្រមូលផ្តុំគ្នា នៅថ្ងៃបុណ្យសពរបស់មេដឹកនាំប្រឆាំងរុស្ស៊ី រយៈពេលពីរសប្តាហ៍ បន្ទាប់ពីការស្លាប់របស់លោក។ ក្រុមបាតុករ បានដាក់ផ្កា និងអុជទៀន ក្នុងការរំលឹកវិញ្ញាណក្ខន្ធ លោក Navalny នៅជិតប៉ម Eiffel ដែលពួកគេភាគច្រើនបង្ហាញពីទុក្ខសោក ចំពោះការស្លាប់របស់លោក Navalny និងកំហឹងប្រឆាំងប្រធានាធិបតីរុស្ស៊ី លោក Vladimir Putin ។ មានមនុស្សតិចតួចប៉ុណ្ណោះ ដែលត្រូវបានអនុញ្ញាតឱ្យចូលរួមក្នុងពិធីបុណ្យសព នៅក្នុងព្រះវិហារមួយកន្លែងនៅទីក្រុងមូស្គូ ដែលត្រូវបានហ៊ុមព័ទ្ធដោយនគរបាល។ លោក Navalny ជាអ្នករិះគន់ឥតសំចៃ លើប្រធានាធិបតី លោក វ្ល៉ាឌីមៀ ពូទីន នៅក្នុងប្រទេសរុស្ស៊ី បានស្លាប់ក្នុងអាយុ ៤៧ ឆ្នាំ នៅក្នុងពន្ធនាគារតំបន់អាកទិក កាលពីថ្ងៃទី ១៦ ខែកុម្ភៈ បង្កឱ្យមានការចោទប្រកាន់ពីអ្នកគាំទ្ររបស់លោកថា លោកត្រូវបានគេធ្វើឃាត ប៉ុន្តែវិមានក្រឹមឡាំង បានច្រានចោលការជាប់ពាក់ព័ន្ធណាមួយ នៅក្នុងការស្លាប់របស់លោក។

អាជ្ញាធរ បានប្រកាសថាខុសច្បាប់នូវសកម្មភាពរបស់លោក ថាជាក្រុមជ្រុលនិយម ហើយបានចាត់ទុកអ្នកគាំទ្ររបស់លោកថាជាអ្នកបង្កបញ្ហាដែលគាំទ្រដោយសហរដ្ឋអាមេរិក ដើម្បីបង្កការធ្វើបដិវត្តន៍។ ការប្រមូលផ្តុំអ្នកគាំទ្ររបស់លោកកាលពីពេលកន្លងទៅ ត្រូវបានបំបែកដោយកម្លាំង។