ថៃ៖ ប្រជាជននៅក្រុងបាងកករបស់ប្រទេសថៃរង់ចាំពេញមួយយប់ ដើម្បីទទួលបានការធ្វើតេស្តវីរុស COVID-19 ដោយឥតគិតថ្លៃ ខណៈករណីនៅក្នុងប្រទេសបានកើនឡើងនៅថ្ងៃសុក្រដល់កម្រិតខ្ពស់បំផុត។
មនុស្សរាប់រយនាក់បានមករង់ចាំនៅវត្ត Phra Si Mahathat ដែលជាមជ្ឈមណ្ឌលមួយក្នុងចំណោមមជ្ឈមណ្ឌលធ្វើតេស្តចំនួន ៥ ដែលបង្កើតឡើងដោយអាជ្ញាធរទីក្រុងបាងកក។ មណ្ឌលនីមួយៗផ្តល់ការធ្វើតេស្តរហូតដល់ ៩០០នាក់ក្នុងមួយថ្ងៃ។ មជ្ឈមណ្ឌលគ្រប់គ្រងស្ថានភាពវីរុស COVID-19 បានប្រកាសនៅថ្ងៃសុក្រថា ក្រុងបាងកក និងខេត្ដចំនួន ៩ នឹងត្រូវរាំងខ្ទប់ចាប់ពីថ្ងៃចន្ទ ទី១២ ខែកក្កដា ខណៈករណីវីរុស COVID-19 បន្តកើនឡើងនៅក្នុងប្រទេសថៃ។ ប្រជាជននៅក្រុងបាងកក និងខេត្តនៅក្បែរនោះត្រូវបានណែនាំឱ្យស្នាក់នៅក្នុងផ្ទះចាប់ពីថ្ងៃចន្ទ ហើយអាចចេញទៅខាងក្រៅបាននៅពេលចាំបាច់។
យោងតាមមន្ត្រីមជ្ឈមណ្ឌលគ្រប់គ្រងស្ថានភាពវីរុស COVID-19 លោកស្រី Apisamai Srirangsan បានអោយដឹងថា បម្រាមគោចរនឹងត្រូវធ្វើឡើងចាប់ពីម៉ោង ៩យប់ដល់ម៉ោង ៤ព្រឹកនៅក្នុងខេត្តទាំង ១០ នេះ ខណៈរដ្ឋាភិបាលបានរឹតបន្តឹងការរឹតត្បិត នៅក្នុងតំបន់ដែលមានហានិភ័យខ្ពស់។ ទោះយ៉ាងណា ប្រជាជននៅតែអាចចាកចេញពីផ្ទះរបស់ពួកគេ ក្នុងករណីបន្ទាន់ ការងារ ឬការមកពិនិត្យសុខភាព។ លោកស្រី Apisamai បាននិយាយថា វិទ្យាស្ថានអប់រំនៅតាមបណ្ដាខេត្តទាំងនេះ តម្រូវឲ្យមានថ្នាក់បង្រៀនតាមអ៊ីនធឺណិតតែប៉ុណ្ណោះ។ លោកស្រីបានបន្ថែមថា ប៉ុស្តិ៍ត្រួតពិនិត្យ និងល្បាតនឹងត្រូវបានបង្កើតឡើងដោយអង្គភាពសន្តិសុខ ដើម្បីធានាថា ការធ្វើដំណើរសាធារណៈមានតិចតួចបំផុត៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
