ប្រធានសិទ្ធិមនុស្សរបស់អង្គការសហប្រជាជាតិកាលពីថ្ងៃសុក្រ បាននិយាយថា ការបដិសេធដោយចេតនានៃដំណើរការដោយសុវត្ថិភាពសម្រាប់ទីភ្នាក់ងារមនុស្សធម៌នៅក្នុងប្រទេសស៊ូដង់ ដែលហែកហួរដោយសង្រ្គាម អាចស្មើនឹងឧក្រិដ្ឋកម្មសង្គ្រាម។ កងកម្លាំងគាំទ្ររហ័សរបស់ប្រទេសស៊ូដង់ (RSF) បាននិងកំពុងប្រយុទ្ធជាមួយកងទ័ពប្រទេសស៊ូដង់ ដើម្បីគ្រប់គ្រងប្រទេសចាប់តាំងពីខែមេសា ឆ្នាំ ២០២៣ នៅក្នុងសង្រ្គាម ដែលបានសម្លាប់មនុស្សរាប់ពាន់នាក់ ជម្លៀសមនុស្សរាប់លាននាក់នៅក្នុង និងក្រៅប្រទេស ហើយបានបង្កឱ្យមានការព្រមានអំពីគ្រោះទុរ្ភិក្ស។ ថ្លែងទៅកាន់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅទីក្រុងហ្សឺណែវ ស្នងការជាន់ខ្ពស់ទទួលបន្ទុកសិទ្ធិមនុស្ស លោក Volker Turk បាននិយាយថា ប្រទេសស៊ូដង់បានក្លាយជា «សុបិន្តអាក្រ» ។ 

ការផ្គត់ផ្គង់ជំនួយ ត្រូវបានលួច ហើយបុគ្គលិកមនុស្សធម៌ បានរងការវាយប្រហារ ខណៈទីភ្នាក់ងារអន្តរជាតិ និងអង្គការក្រៅរដ្ឋាភិបាលបានត្អូញត្អែរអំពីឧបសគ្គក្នុងដំណើរ ទៅកាន់មជ្ឈមណ្ឌលគ្រប់គ្រងដោយកងទ័ពនៅទីក្រុង ព័រ អូប្រាំង ដើម្បីទទួលបានជំនួយមនុស្សធម៌ចូលមកក្នុងប្រទេសនេះ។ ក្រុមតស៊ូមតិ សម្រាប់ជនភៀសខ្លួនក្នុងស្រុកបាននិយាយថា មនុស្សរាប់លាននាក់នៅក្នុងទីក្រុង Darfur ប្រទេសស៊ូដង់ កំពុងប្រឈមមុខនឹងការស្លាប់ដោយសារភាពអត់ឃ្លាន បន្ទាប់ពីការសម្រេចចិត្តរបស់រដ្ឋាភិបាលស៊ូដង់ ក្នុងការហាមឃាត់ការផ្តល់ជំនួយតាមរយៈប្រទេសឆាដ។ 

យោងតាមអង្គការសហប្រជាជាតិ បានឲ្យដឹងថា ពាក់កណ្តាលនៃចំនួនប្រជាជនស៊ូដង់ ប្រហែល ២៥ លាននាក់ ត្រូវការជំនួយមនុស្សធម៌ និងការការពារ ខណៈមនុស្សរាប់លាននាក់បានភៀសខ្លួនទៅកាន់សាធារណរដ្ឋអាហ្រ្វិកកណ្តាល ឆាដ អេហ្ស៊ីប អេត្យូពី និងប្រទេសស៊ូដង់ខាងត្បូង ។