អុីស្រាអែល ៖ អង្គការសហប្រជាជាតិ បាននិយាយថា ការវាយប្រហាររបស់យោធាអ៊ីស្រាអែលទៅលើមន្ត្រីនគរបាលប៉ាឡេស្ទីនដែលការពាររថយន្តដឹកជំនួយ បាននាំឲ្យមានបំពានច្បាប់ និងសណ្តាប់ធ្នាប់ នៅក្នុងតំបន់ហ្កាហ្សា ស្ទ្រីប។

ការអះអាងនេះ ត្រូវបានធ្វើឡើង ខណៈដែលក្រុមហាម៉ាស បាននិយាយកាលពីថ្ងៃសុក្រថា ចំណាប់ថ្នូរចំនួន ៧នាក់ទៀត ដែលត្រូវបានចាប់ខ្លួនកាលពីថ្ងៃទី៧ ខែតុលា បានស្លាប់ ដោយសារតែការវាយប្រហាររបស់អ៊ីស្រាអែល ក្នុងប៉ុន្មានសប្តាហ៍ថ្មីៗនេះ។

ក្រុមភេរវជន មិនបានប្រាប់ឈ្មោះ ឬកាលបរិច្ឆេទសម្រាប់អ្នកស្លាប់ទាំងនោះទេ។ ក្រុមហាម៉ាស បានចាប់ជនជាតិអ៊ីស្រាអែល និងជនបរទេសប្រហែល ២៥០នាក់ ក្នុងអំឡុងពេលការវាយប្រហាររបស់ខ្លួន គឺប្រហែល ១៣០នាក់ នៅជាប់ឃុំនៅឡើយ។

ភាពធ្ងន់ធ្ងរនៃវិបត្តិសន្តិសុខនៅតំបន់ហ្កាហ្សា ត្រូវបានគូសបញ្ជាក់កាលពីថ្ងៃព្រហស្បតិ៍ នៅពេលដែលហ្វូងមនុស្សអស់សង្ឃឹម បានលុកលុយក្បួនរថយន្តដែលដឹកម្សៅ ហើយកងទ័ពអ៊ីស្រាអែល បានបើកការបាញ់ប្រហារ ដោយលើកឡើងពី«ការគំរាមកំហែង» ដល់ទាហានរបស់ខ្លួន។

សហរដ្ឋអាមេរិក បានសន្យាថា នឹងចាប់ផ្តើមផ្តល់ជំនួយ ដោយទម្លាក់ពីយន្តហោះទៅកាន់តំបន់ហ្កាហ្សា ចំពេលមានស្ថានភាពមិនច្បាស់លាស់ដែលរថយន្តដឹកជំនួយកំពុងប្រឈម។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បាននិយាយថា៖«នៅប៉ុន្មានថ្ងៃខាងមុខនេះ យើងនឹងចូលរួមជាមួយមិត្តភក្តិរបស់យើងនៅហ្ស៊កដានី និងអ្នកផ្សេងទៀតដែលកំពុងផ្តល់អាហារ និងការផ្គត់ផ្គង់បន្ថែមពីលើអាកាស «ហើយនឹង» ស្វែងរកការបើកផ្លូវផ្សេងទៀតនៅក្នុង រួមទាំងអាចធ្វើទៅតាមច្រករបៀងសមុទ្រ»។