កណ្ដាល ៖ នៅព្រឹកថ្ងៃទី២ ខែមីនា ឆ្នាំ២០២៤ ឯកឧត្តម ទ្រី ដាលុច អនុប្រធានក្រុមការងារយុវជនគណបក្ស ចុះមូលដ្ឋាន​ស្រុកកណ្តាលស្ទឹង និងជាប្រធានក្រុមការងារយុវជនគណបក្ស ចុះមូលដ្ឋានឃុំត្បែង បានអញ្ជើញចុះជួបសំណេះសំណាលជាមួយសមាជិកសមាជិកា ក្រុមការងារយុវជនបក្សឃុំត្បែង ដោយមានការចូលរួម ពីប្រធាន អនុប្រធានគណបក្សឃុំ សមាជិក សមាជិកា នៃក្រុមការងារយុវជនគណបក្សចុះមូលដ្ឋានឃុំត្បែង ព្រមទាំងមានពិធីប្រគល់ប័ណ្ណសរសើរបក្សជូនដល់សមាជិក សមាជិការយុវជនបក្សផងដែរ។ 

ក្នុងឱកាសនោះ ឯកឧត្តម ទ្រី ដាលុច បានមានប្រសាសន៍ ផ្ដើមផ្ញើសួរសុខទុក្ខពីសំណាក់ អ្នកឧកញ៉ា បណ្ឌិត ទ្រី ភាព ទីប្រឹក្សាសម្តេចតេជោ ហ៊ុន សែន និងជាអនុប្រធានក្រុមការងារគណបក្សចុះមូលដ្ឋានស្រុកកណ្ដាលស្ទឹង 

និងជាប្រធានក្រុមការងារគណបក្សចុះមូលដ្ឋានឃុំត្បែង និងផ្តាំសួរសុខទុក្ខពីសំណាក់ឯកឧត្តម ណុប រ័ត្ននិមល ប្រធានក្រុមការងារយុវជនគណបក្សចុះមូលដ្ឋាន ស្រុកកណ្ដាលស្ទឹង ទៅដល់បងប្អូន សមាជិក សមាជិកា និង ក្រុមការងារទាំងអស់ផងដែរ។

ឯកឧត្តមបានមានប្រសាសន៍បន្តថា គ្រប់សកម្មភាពទាំងអស់ដែលទាក់ទងនឹងកិច្ចការងារគណបក្ស កិច្ចការងារសង្គម សាសនា ជាពិសេសការអភិវឌ្ឍន៍មូលដ្ឋានឃុំក្បែង គឺតែងតែមានការចូលរួមគាំពារ អ្នកឧកញ៉ា និងឯកឧត្តមប្រធាន ជាប្រចាំ។ ក្រៅពីកិច្ចការងារនេះ អ្នកឧកញ៉ាប្រធាន និងឯកឧត្តមប្រធាន បានយកចិត្តទុកដាក់ខ្ពស់លើការពង្រឹងកម្លាំង និងសមត្ថភាពយុវជន តាមរយៈការបំពាក់បំប៉នចំណេះដឹង និងសមត្ថ ភាពផ្នែកប្រាជ្ញាស្មារតីផងដែរ។ ជារួម គណបក្សប្រជាជនកម្ពុជា តែងប្រកាន់ខ្ជាប់នូវឧត្តមគតិស្នេហាជាតិ ពលិកម្មគ្រប់បែបយ៉ាង ដើម្បីប្រទេសជាតិ ជាពិសេស សម្តេចតេជោ ហ៊ុន សែន ប្រធានគណបក្សប្រជាជនកម្ពុជាតែម្ដង

ដែលលោកតែងតែយកចិត្តទុកដាក់ដល់ប្រជាពលរដ្ឋគ្រប់ទីកន្លែង។ 

ឯកឧត្តម បានបន្រទៀតថា ស្របពេលនឹងការខិតខំប្រឹងប្រែងអភិវឌ្ឍន៍សមត្ថភាពរបស់ខ្លួនហើយ យើងជាយុវជនត្រូវចូលរួមទប់ស្កាត់ និងចៀសឱ្យផុតពីអំពើអបាយមុខទាំងពួងដូចជា ការសេព ឬជួញដូរគ្រឿងញៀន ការលេងល្បែងស៊ីសង ការប្រើប្រាស់អំពើហិង្សា និងការផ្សព្វផ្សាយនូវអ្វីដែលប្រាស់ចាកពីប្រពៃណី វប្បធម៌ដ៏ផូរផង់របស់កម្ពុជាយើង។ ឯកឧត្តម បានសម្តែងនូវការដឹងគុណយ៉ាងក្រៃលែងចំពោះបងប្អូនសមាជិក សមាជិកាគណបក្សទាំងអស់ ដែលតែងអនុវត្តតាមគោលនយោបាយគណបក្សប្រជាជនកម្ពុជា ក្នុងបុព្វហេតុនៃសន្តិភាព និងបុព្វហេតុនៃការអភិវឌ្ឍ តាមតំរូវីរភាពរបស់ថ្នាក់ដឹកនាំ។ តាមរយៈសកម្មភាពទាំងអស់នេះ នឹងអាចរួមគ្នាថែរក្សាសមិទ្ធផលវិជ្ជមានរបស់យុវជនជំនាន់រៀមច្បង ដែលបានខិតខំកសាង និងចូលរួមថែរក្សាសន្តិ ភាពឱ្យបានគង់វង្ស។ 

នាឱកាសនេះផងដែរ ឯកឧត្តម ក៏បានអញ្ជើញផ្ដល់កិត្តិយសប្រគល់ប័ណ្ណសរសើរការងារបក្សជូនដល់សមាជិកសមាជិកាជាច្រើនរូបផងដែរ។ ហើយបន្ទាប់មកឯកឧត្តម និងក្រុមការងារ ក៏បានអញ្ជើញពិនិត្យមើលសមិទ្ធផលសំខាន់ៗដែលបានកសាងនៅទីនេះ រួមមានអគារសាលារៀន អនុវិទ្យាល័យហ៊ុនសែនត្បែង ដែលមានចំនួន២ខ្នង ដែល១ខ្នងបានសាងសង់រួចរាល់ និងមួយខ្នងទៀតកំពុងសាងសង់ ដោយមានទាំងទីចាត់ការផងដែរ។ 

បន្ទាប់មកឯកឧត្តមក៏បានអញ្ជើញពិនិត្យទីតាំងដើម្បីត្រៀមសាងសង់តារាងបាល់ទាត់មួយទៀតនៅក្នុងឃុំត្បែង ស្រុកកណ្ដាលស្ទឹង ខេត្តកណ្ដាលនេះ ដើម្បីទុកឲ្យយុវជនបានហ្វឹកហាត់ លេងកីឡា ដើម្បីសុខភាពល្អទាំងអស់គ្នា៕