ហៃទី ៖ មេដឹកនាំក្រុមជនអន្ធពាលហៃទី លោក Jimmy Cherizier ដែលត្រូវបានគេស្គាល់ថា ជា Barbecue បានព្រមានកាលពីថ្ងៃសុក្រ (ទី១ ខែមីនា)ថា ខ្លួននឹងបន្តព្យាយាមបណ្តេញនាយករដ្ឋមន្ត្រី Ariel Henryចេញពីតំណែង ហើយបានស្នើឲ្យក្រុមគ្រួសាររក្សាកុមារមិនឲ្យទៅសាលារៀន ដើម្បី «ជៀសវាងបញ្ហាសន្តិសុខ នៅពេលដែលអំពើហិង្សា កើនឡើងនៅក្នុងផ្នែកនានានៃរាជធានីនេះ។

ការបាញ់ប្រហារយ៉ាងខ្លាំងក្លា និងការរំខានចរាចរណ៍ ត្រូវបានគេឃើញនៅក្នុងតំបន់មួយចំនួននៃរដ្ឋធានីរបស់ប្រទេសហៃទី ជាកន្លែងដែលមនុស្សកាន់តែច្រើន បានភៀសខ្លួនចេញពីផ្ទះសម្បែង នៅជិតកន្លែង ប្រយុទ្ធគ្នា ខណៈដែលរថយន្តក្រុងដែលឆេះ នៅតាមដងផ្លូវ និងរបាំងផ្លូវឆេះហុយផ្សែងពណ៌ប្រផេះ    ក្រាស់ហុយយ៉ាងខ្មួលខ្មាញ់ទៅលើអាកាស។

លោក Cherizier គឺជាអតីតមន្ត្រីនគរបាលដែលដឹកនាំសម្ព័ន្ធភាពនៃក្រុមអន្ធពាល និងរំខានដល់ប្រទេសនេះ នៅពេលដែលលោក បានបិទស្ថានីយប្រេងដ៏ធំបំផុតរបស់ខ្លួន ក្នុងឆ្នាំ ២០២២។ លោកបានប្រឈមមុខនឹងទណ្ឌកម្មទាំងពីអង្គការសហប្រជាជាតិ និងក្រសួងរតនាគារសហរដ្ឋអាមេរិក។

គិតត្រឹមល្ងាចថ្ងៃសុក្រ មានសេចក្តីរាយការណ៍ថា បុរសប្រដាប់អាវុធ បានប៉ុនប៉ងចូលគ្រប់គ្រងកំពង់ផែកុងតឺន័រសំខាន់របស់រដ្ឋធានី ខណៈដែលក្រុមជនអន្ធពាល បានគំរាមវាយប្រហារប៉ុស្តិ៍នរគបាល ក្នុងទីក្រុងបន្ថែមទៀត។ សារព័ត៌មានរ៉យទ័រ មិនអាចផ្ទៀងផ្ទាត់របាយការណ៍ទាំងនេះ ភ្លាមៗបានទេ។

នៅក្នុងសេចក្តីថ្លែងការណ៍មួយ ការិយាល័យរបស់លោកនាយករដ្ឋមន្ត្រី Henry បាននិយាយថា ខ្លួនមានការខឹងសម្បាចំពោះអំពើហិង្សា និងភេរវកម្មដែលរៀបចំដោយក្រុមចោរប្រដាប់អាវុធ ហើយបានសម្តែងការរំលែកទុក្ខដល់ក្រុមគ្រួសារជនរងគ្រោះ ដោយអះអាងថា រដ្ឋាភិបាល នឹងបន្តធ្វើការដោះស្រាយជម្លោះនេះ។