ការិយាល័យសម្របសម្រួលកិច្ចការមនុស្សធម៌(OCHA) របស់អង្គការសហប្រជាជាតិ(UN) និយាយថា ក្រុមការងារ OCHA អង្គការសុខភាពពិភពលោក(WHO) និងមូលនិធិកុមារអន្តរជាតិ UNICEF បានចែកចាយជំនួយមនុស្សធម៌ទៅកាន់តំបន់ហ្កាហ្សា ។

OCHA និយាយថា ក្រុមការងាររបស់ពួកគេ បានធ្វើដំណើរទៅកាន់មន្ទីរពេទ្យ Al-Shifa និងបានផ្តល់ឱសថ វ៉ាក់សាំង និងបានជួបជាមួយអ្នករងរបួសក្នុងឧបទ្ទេវហេតុចែកចាយជំនួយក្នុងតំបន់ហ្កាហ្សា ។

OCHA បាននិយាយនៅក្នុងសេចក្តីថ្លែងការណ៍ថា នេះគឺជាលើកដំបូងហើយដែលក្បួនរថយន្ត UN អាចចែកចាយជំនួយចូលទៅកាន់តំបន់ភាគខាងជើងហ្កាហ្សា ក្នុងរយៈពេលជាង ១សប្តាហ៍កន្លងមកនេះ ។

ប្រជាជនប៉ាឡេស្ទីន ដែលបានរងរបួសនៅក្នុងមហន្តរាយស្វែងរកជំនួយនៅក្នុងតំបន់ហ្កាហ្សា បាននិយាយថា កងកម្លាំងអ៊ីស្រាអែល បានបាញ់មកលើពួកគេ ខណៈពួកគេប្រញាប់ប្រញាល់ទៅទទួលយកស្បៀងអាហារសម្រាប់គ្រួសារ ដោយរៀបរាប់ទិដ្ឋភាពនោះថាជាភេរវកម្ម និងជាភាពចលាចល ។ 

អាជ្ញាធរសុខាភិបាលនៅតំបន់ហ្កាហ្សាគ្រប់គ្រងដោយក្រុមហាម៉ាស បាននិយាយថា មនុស្សចំនួន ១១៥ នាក់ ត្រូវបានសម្លាប់នៅក្នុងឧបទ្ទវហេតុកាលពីថ្ងៃព្រហស្បតិ៍ ។ ការស្លាប់ពលរដ្ឋប៉ាឡេស្ទីន គឺដោយសារការបាញ់កាំភ្លើងរបស់អ៊ីស្រាអែល និងបានចាត់ទុករឿងនេះថាជាការសម្លាប់រង្គាល ។

ទោះបីជាយ៉ាងណាក៏ដោយ ខាងអ៊ីស្រាអែល បានជំទាស់ទៅនឹងតួលេខអ្នកស្លាប់ទាំងនេះ ហើយបាននិយាយថា ជនរងគ្រោះភាគច្រើន ស្លាប់ដោយសារប្រជ្រៀតគ្នា ឬរត់ជាន់គ្នា ៕