ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល នៃរដ្ឋបាលរាជធានីភ្នំពេញ ថ្លែងប្រាប់BTV ព័ត៌មាន នាព្រឹកថ្ងៃទី៣ ខែមីនា ឆ្នាំ២០២៤នេះថា បច្ចុប្បន្នមនី្ទរសុខាភិបាលរាជធានីភ្នំពេញ បានសហការជាមួយកងពលតូចលេខ៧០«ង ៧០» សម្រុកចុះបាញ់ថ្នាំសម្លាប់សត្វមូស តាមខណ្ឌ សង្កាត់ ដែលមានករណីជំងឺគ្រុនឈាមកើនឡើង ក្នុងមូលដ្ឋានរាជធានីភ្នំពេញ។

ឯកឧត្តមវេជ្ជបណ្ឌិត ងី មានហេង បានបន្តថា ការចុះបាញ់ថ្នាំមូសនៅតាមខណ្ឌ សង្កាត់ ដែលមានករណីជំងឺគ្រុនឈាមកើនឡើងនេះ ចាប់ផ្តើមពីថ្ងៃទី២៣ ខែកុម្ភះ ដល់ថ្ងៃទី១៣ ខែមីនា ឆ្នាំ២០២៤ មានរយៈពេល២០ថ្ងៃ។ បើគិតត្រឹមរាត្រីថ្ងៃទី២ ខែមីនា ឆ្នាំ២០២៤ មន្រី្តរបស់យើងបានចុះបាញ់ថ្នាំមូស សរុបចំនួន៥៨សង្កាត់ ក្នុងចំណោម១០៥សង្កាត់ ហើយ៥៨សង្កាត់នេះ ឋិតក្នុងខណ្ឌចំនួន១០ និងខណ្ឌចំនួន៥ បានបាញ់ថ្នាំមូសរួចរាល់ហើយ រួមមាន៖ ខណ្ឌពោធិ៍សែនជ័យ មានចំនួន៧សង្កាត់, ខណ្ឌមានជ័យ មានចំនួន៧សង្កាត់, ខណ្ឌសែនសុខ មានចំនួន៦សង្កាត់, ខណ្ឌដង្កោ មានចំនួន១២សង្កាត់ និងខណ្ឌទួលគោក មានចំនួន១០សង្កាត់។ ដោយឡែកនៅថ្ងៃទី៣ ខែមីនានេះ យើងចុះបាញ់ថ្នាំមូសក្នុងខណ្ឌព្រែកព្នៅ ក្នុងសង្កាត់ចំនួន៥ និងថ្ងៃទី៤ ខែមីនា បន្តចុះបាញ់ថ្នាំមូស នៅខណ្ឌបឹងកេងកង ក្នុងសង្កាត់ចំនួន៧វិញ។

ក្នុងនាមប្រធានមនី្ទរសុខាភិបាលរាជធានីភ្នំពេញ សូមអំពាវនាវប្រជាពលរដ្ឋរស់នៅរាជធានីភ្នំពេញចូលរួមលុបបំបាត់ជម្រកមូសខ្លា។ ទឹកដក់ជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀង ជាជម្រកមូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៏របស់យើង ដើម្បីរួមចំណែកទប់ស្កាត់ការចម្លងជំងឺគ្រុនឈាម។ មូសខ្លាជាភ្នាក់ងារចំលងជំងឺគ្រុនឈាម រីឯមូសអង្កាមមិនមែនជាភ្នាក់ងារចម្លងជំងឺគ្រុនឈាមទេ។ គ្មានជម្រកមូសខ្លា គ្មានការចំលងជំងឺគ្រុនឈាម៕ អត្ថបទ រដ្ឋា