ការដើរដង្ហែរក្បួនតវ៉ាដោយពលរដ្ឋអ៊ីស្រាអែល រាប់ពាន់នាក់ដែលទាមទារឱ្យដោះលែងចំណាប់ថ្នូរនៅហ្កាហ្សា បានចូលដល់ទីក្រុងហ្សេរុយសាឡឹម កាលពីថ្ងៃសៅរ៍ (០២ មីនា) ខណៈដែលក្រុមអ្នកចរចាបានរៀបចំដើម្បីបន្តការចរចាបទឈប់បាញ់នៅទីក្រុងគែរ នៅថ្ងៃអាទិត្យ (០៣ មីនា) នេះដែលនឹងរួមបញ្ចូលកិច្ចព្រមព្រៀងដោះដូរជាមួយក្រុមហាម៉ាស។

ដោយកាន់ទង់ជាតិអ៊ីស្រាអែល និងផ្ទាំងរូបភាពរបស់ចំណាប់ថ្នូរ អ្នកតវ៉ាទាំងនោះបានធ្វើការដើរក្បួនរយៈពេល ៤ ថ្ងៃដែលបានចាប់ផ្តើមនៅទីតាំងមួយក្នុងការវាយប្រហារកាលពីថ្ងៃទី០៧ ខែតុលា ដោយក្រុមយុទ្ធជនហាម៉ាស ហើយត្រូវបានគេរំពឹងថានឹងមានការចូលរួមដោយក្រុមបាតុករបន្ថែមទៀតនៅឯការប្រមូលផ្ដុំនៅខាងក្រៅនិវេសនដ្ឋានរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu)។

រយៈពេលជិតប្រាំខែនៃសង្រ្គាមនៅហ្កាហ្សា ចំណាប់ថ្នូរចំនួន ១៣៤ នាក់នៅតែត្រូវបានឃុំខ្លួននៅក្នុងតំបន់ឆ្នេរហ៊ុមព័ទ្ធ នេះបើយោងតាមអាជ្ញាធរអ៊ីស្រាអែល។

ក្នុងចំណោមអ្នកទាំងនោះមានទាហាន និងជនស៊ីវិល បុរស ស្ត្រី និងកុមារជាច្រើននាក់ ហើយចំណាប់ខ្មាំងថ្នូររាប់សិបនាក់អាចនឹងត្រូវបានដោះលែងប្រសិនបើកិច្ចព្រមព្រៀងសន្តិភាពត្រូវបានឈានដល់៕