ភ្នំពេញ៖ ក្នុងស្ថានភាពដ៏លំបាកដោយសារផលប៉ះពាល់នៃជំងឺកូវីដ-១៩ នៅរសៀលថ្ងៃទី១០ ខែកក្កដា ឆ្នាំ២០២១នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី ចុះសួរសុខទុក្ខ និងនាំយកអំណោយមនុស្សធម៌ជាលើកទី៩ ជូនដល់អង្គការលើកស្ទួយប្រជាពលដ្ឋ សម្រាប់ជួយសម្រាលដល់ការលំបាកក្នុងការរស់នៅប្រចាំថ្ងៃរបស់បុគ្គលិក និងសិស្សចំនួន ៩៥នាក់ ដែលរស់នៅក្នុងអង្គការ ហើយដែលកំពុងបន្តបង្ហាត់បង្រៀនតាមរយៈប្រព័ន្ធអនឡាញ ដល់កុមារ និងសិស្សានុសិស្សចំនួន ១,០១០នាក់ ដែលជាបន្ទុករបស់អង្គការក្នុងឆ្នាំ២០២១នេះ។
ក្នុងឱកាសជួបសំណេះសំណាលនោះលោកជំទាវ អគ្គលេខាធិការរងទី១ បាននាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ដោយក្តីនឹករលឹក អាណិតស្រឡាញ់ ចំពោះក្មួយៗនិងចៅៗកុមារទាំងអស់ ពិសេសថ្លែងនូវការកោតសរសើរ ចំពោះស្ថាបនិក គ្រូ-បុគ្គលិក និងអ្នកស្ម័គ្រចិត្តរបស់អង្គការទាំងអស់ ដែលបាននិងកំពុងយកចិត្តទុកដាក់ ខិតខំអស់កម្លាំងកាយ-ចិត្តចូលរួមចំណែកជាមួយរាជរដ្ឋាភិបាលកម្ពុជា ដើម្បីជួយដល់កុមារកំព្រា កុមាររស់នៅក្នុងគ្រួសារក្រីក្រ និងរស់នៅក្នុងគ្រួសាររើសសំរាមឱ្យមានឱកាសទទួលបានសិទ្ធិពេញលេញក្នុងការរស់រានមានជីវិត សិទ្ធិទទួលបានការសិក្សាអប់រំ សិទ្ធិការពារ និងសិទ្ធិក្នុងការចូលរួមក្នុងការងារសង្គម ជាពិសេសទទួលបានជោគជ័យក្នុងជីវិត។
អ្វីដែលធ្វើឱ្យក្មួយៗ ចៅៗ និងបុគ្គលិកនៃអង្គការរឹតតែមានក្តីរំភើយ៉ាងក្រៃលែងនោះ គឺពួកគាត់បានទទួលយកនូវសារសំឡេងផ្ទាល់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមប្រព័ន្ឋតេឡេក្រាម ដែលបានជូនពរដល់ក្មួយៗចៅៗទាំងអស់ឱ្យមានសុខភាពល្អ មានសិរីសួស្តី សុភមង្គល និងចៀសផុតពីជំងឺកូវីដ-១៩ និងការជូនពរចំពោះថ្នាក់ដឹកនាំ-លោកគ្រូអ្នកគ្រូសូមមានសុខភាពល្អ ដើម្បីបន្តដឹកនាំក្មួយៗចៅៗទាំងអស់ឆ្ពោះទៅរកអនាគតល្អរៀងៗខ្លួន។
លោកស្រី នួន ភីមាន ស្ថាបនិកអង្គការ និងក្នុងនាមជាបុគ្គលិក គ្រូ សិស្សានុសិស្ស និងអាណាព្យាបាលសិស្ស នៃអង្គការលើកស្ទួយប្រជាពលរដ្ឋ បានថ្លែងអំណរគុណយ៉ាងជ្រាលជ្រៅចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលមានទឹកចិត្តមេត្តា ករុណា យកចិត្តទុកដាក់ គិតគូរ ជួយឧបត្ថម្ភជាបន្តបន្ទាប់ ជាពិសេសលើកទឹកចិត្ត ជំរុញក្មួយៗកុមារឱ្យខិតខំសិក្សារៀនសូត្រ ដើម្បីក្លាយជាធនធានមនុស្សដ៏សំខាន់របស់ប្រទេសជាតិនាពេលអនាគត។
សូមបញ្ជាក់ថា អំណោយដែលបានផ្តល់ជូនអង្គការលើកស្ទួយប្រជាពលដ្ឋរួមមាន៖ អង្ករ ៥តោន, មី ៧០កេស, ត្រីខ ១០កេស, ទឹកត្រី ៦០ដប, ទឹកស៊ីអ៊ីវ ៦០ដប, ទឹកក្រូច ២០កេស, ទឹកសុទ្ធ ៣០កេស, ផ្លែទំពាំងបាយជូរ ៥កេស, ផ្លែប៉ោម ៥កេស, ផ្លែក្រូចឃ្វិច ៥កេស, នំបុ័ងដាក់សាច់ ៣០០ដើ, ម៉ាស់៥ពាន់បន្ទះ, អាល់កុល ៦០លីត្រ និងថវិកា ១០,០០០,០០០រៀល (ដប់លានរៀល)។
ដែលអំណោយខាងលើនេះ គឺជាព្រះរាជទានពីសម្តេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាការឧបត្ថម្ភពីសប្បុរសជននានាតាមរយៈកាកបាទក្រហមកម្ពុជា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
