ខេត្តពោធិ៍សាត់ ៖ ឯកឧត្តមបណ្ឌិត ទី នរិន្ទ ប្រធានក្រុមការងាររាជរដ្ឋាភិបាលចុះជួយស្រុកបាកាន បាន​អញ្ជើញជួប ជាមួយតំណាងការិយាល័យអប់រំស្រុក នាយកវិទ្យាល័យ អនុវិទ្យាល័យ និង​ប្រធាន​កម្រង​សាលារៀននៅស្រុកបាកាន ដើម្បីពិភាក្សា​លើ​ផែនការបង្កើត “ក្លឹបគ្រូបង្រៀន​ស្រុកបាកាន​”។

ឯកឧត្តមបណ្ឌិត ទី នរិន្ទ បានលើកឡើងថាការបង្កើត “ក្លឹបគ្រូបង្រៀនស្រុកបាកាន” នេះ​គឺ​ក្រោម​គំនិត​ផ្តួចផ្តើមរបស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និង​ជា​ប្រធាន​ក្រុម​ការងារ​រាជ​រដ្ឋាភិបាលចុះមូលដ្ឋានខេត្តពោធិ៍សាត់ ក្នុងគោល​បំណង​ចូលរួម​លើក​កម្ពស់​វិស័យ​អប់រំ​ក្នុងស្រុកបាកាន និងសម្តែងការដឹងគុណដ៏ស្មោះចំពោះលោកគ្រូ អ្នកគ្រូ ដែលបាន​ចូល​រួម​បំពេញ​កាតព្វ​កិច្ច​យ៉ាងពេ​ញទំហឹងដោយមិនខ្លាចនឿយហត់ ក្នុងការបណ្តុះ​បណ្តាល​ធន​ធាន​មនុស្ស​គ្រប់​ស្រទាប់​វណ្ណៈ មិនថាជាកូន កម្មករ កសិករ មន្ត្រីរាជការ ប៉ូលីស ទាហាន អ្នកមាន ឫអ្នកក្រនោះទេ ដើម្បី​អាចឱ្យពួកគេអាចស្វែងរក អនាគតល្អ រៀងៗខ្លួន និងរួម​ចំណែក​ក្នុង​ការ​អភិវឌ្ឍ​សេដ្ឋកិច្ច​គ្រួសារ សហគមន៍ ភូមិ ឃុំ ស្រុក ក៏ដូចជា ប្រទេសជាតិទាំងមូល ហើយឯកឧត្តមរដ្ឋមន្ត្រី កែវ រតនៈ នឹងឈរជាប្រធានកិត្តិយសនៃក្លឹបនេះ តាមរយៈនៃការឈរជាប្រធានកិត្តិយសនៃក្លឹប ឯកឧត្តម នឹងកៀរគរថវិកា សំភារៈ និងការជួយឧត្ថម្ភ ពីសប្បុរសជននានា ដើម្បី​យក​មក​ដាក់​ចូល​ក្នុង​ក្លឹប​ខាង​លើ ដើម្បីជួយដល់លោកគ្រូ អ្នកគ្រូ ដែលមាន ជីវភាព លំបាកក្រីក្រ ឬកំពុង​ជួប​បញ្ហា​ណា​មួ​​យចំពោះមុខ ឬក៏ដើម្បីបំពេញនូវតម្រូវការជាក់ស្ដែងណា មួយផ្សេង​របស់​លោក​គ្រូ​អ្នកគ្រូ​តាម​ការ​សម្រេចរបស់មតិភាគច្រើនរបស់ក្លឹប ដែលអាចចូលរួមជួយលើក ស្ទួយកិត្តិយស និង​សេចក្តី​ថ្លៃថ្នូរ របស់លោកគ្រូ អ្នកគ្រូ ជាពិសេសអាចពង្រឹងចំណងមិត្តភាព សាមគ្គី ភាព រវាងគ្នា​នឹង​គ្នា ឱ្យបានកាន់តែល្អប្រសើរ ទៅតាមលទ្ធភាពដែលអាចធ្វើទៅបាន។

គួរឲ្យដឹងដែរថា បច្ចុប្បន្ននេះនៅក្នុងស្រុកបាកានទាំងមូល មានសាលារៀនចំនួន១៤៧ ដែល​ក្នុ​ង​នោះមា​ន វិទ្យាល័យចំនួន៤ អនុវិទ្យាល័យចំនួន៨ សាលាបឋមសិក្សាចំនួន៦៧ សាលា​មត្តេយ្យ​សិក្សា​រដ្ឋ​ចំនួន៤៣ និងសាលាមត្តេយ្យសហគមន៍ចំនួន២៥ ដោយមានបុគ្គលិកអប់រំ គ្រូបង្រៀន និង​គ្រូកិច្ចសន្យា សរុបប្រមាណ១០០០នាក់៕ អត្ថបទ៖ភិរុណ ពៅ