អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គ.ជ.ប នឹងប្រកាសលទ្ធផលផ្លូវការបោះឆ្នោតជ្រើសតាំងសមាជិកព្រឹទ្ធសភានៅថ្ងៃស្អែកនេះ បន្ទាប់ពីមិនមានពាក្យបណ្តឹងជំទាស់នឹងលទ្ធផលបណ្តោះអាសន្ន។
ឯកឧត្តម ហង្ស ពុទ្ធា សមាជិក និងជាអ្នកនាំពាក្យ គ.ជ.ប បានថ្លែងប្រាប់ BTV ឱ្យដឹងនៅថ្ងៃទី៤ ខែមីនា ឆ្នាំ២០២៤ថា ដើម្បីឆ្ពោះទៅបន្តនីតិវិធីក្រោយការប្រកាសលទ្ធផលបឋម និងលទ្ធផលបណ្តោះអាសន្នតាមភូមិភាគនីមួយៗ។ គ.ជ.ប បានបិទបញ្ចប់ការទទួលពាក្យបណ្តឹងជំទាស់ទៅនឹងលទ្ធផលបណ្តោះអាសន្នពីគណបក្សនយោបាយ ហើយនៅថ្ងៃទី៥ ខែមីនាស្អែកនេះ គ.ជ.ប នឹងធ្វើការប្រកាសលទ្ធផលផ្លូវការ រួមនឹងចំនួនអាសនៈរបស់គណបក្សនយោបាយដែលទទួលបានសំឡេងគាំទ្រក្នុងបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤។
អ្នកនាំពាក្យរូបនេះបញ្ជាក់ទៀតថា ការមិនមានពាក្យបណ្តឹងជំទាស់នឹងលទ្ធផលបណ្តោះអាសន្ន បានឆ្លុះបញ្ចាំងដល់ការបោះឆ្នោតជ្រើសតាំងសមាជិកព្រឹទ្ធសភានេះមានភាពល្អប្រសើរ ដោយសារគណបក្សនយោបាយមានភាពចាស់ទុំ និងទទួលយកចំពោះលទ្ធផលនៃការរៀបចំការបោះឆ្នោតនេះ។
ឯកឧត្តម ហង្ស ពុទ្ធា បានឱ្យដឹងទៀតថា ក្រោយពីការប្រកាសលទ្ធផលផ្លូវការ និងចំនួនអាសនៈរួចរាល់ ព្រឹទ្ធសភានឹងដំណើរការសកម្មភាពដោយរៀបចំការអញ្ជើញសមាជិកព្រឹទ្ធសភាដែលជាប់ឆ្នោតក្នុងការបោះឆ្នោតជ្រើសតាំងសមាជិកព្រឹទ្ធសភា ដើម្បីចូលរួមកិច្ចប្រជុំលើកដំបូងទៅតាមការកំណត់កាលបរិច្ឆេទរបស់ខ្លួន។
សូមជម្រាបថា យោងតាមលទ្ធផបណ្តោះអាសន្ននៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែល គ.ជ.ប បានប្រកាស គណបក្សប្រជាជនកម្ពុជា ទទួលបានសំឡេងគាំទ្រ និងអាសនៈច្រើនជាងគេ គឺទទួលបានសំឡេងជិត ៩៥% នៃចំនួនអង្គបោះឆ្នោតសរុបដោយត្រូវកាន់កាប់ ៥៥ អាសនៈក្នុងចំណោម ៥៨ អាសនៈ ដែលចេញពីការបោះឆ្នោតអសកល៕ អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
