ទីភ្នាក់ងារព័ត៌មានរ៉យទ័រ បានរាយការណ៍ថា រដ្ឋមន្ត្រីការបរទេសតួកគី លោក Hakan Fidan បានអំពាវនាវឲ្យមានការពិភាក្សាស្តីពីបទឈប់បាញ់នៅអ៊ុយក្រែន ដើម្បីចាប់ផ្តើម បន្ទាប់ពីវេទិកាការទូត នៅទីក្រុង អានតាល់យ៉ា (Antalya) របស់ប្រទេសទួរគី។

សារព័ត៌មានរ៉យទ័រ បានរាយការណ៍ថា លោក Fidan បាននិយាយកាលពីថ្ងៃទី៣ ខែមីនា៖«ចំពោះបញ្ហាអ៊ុយក្រែន ទស្សនៈរបស់យើង គឺថាភាគីទាំងពីរ បានឈានដល់ដែនកំណត់នៃអ្វីដែលពួកគេអាចទទួលបានដោយសង្រ្គាម។ យើងគិតថា វាដល់ពេលហើយ ដើម្បីចាប់ផ្ដើមកិច្ចពិភាក្សាមួយសម្រាប់បទឈប់បាញ់»។

លោក Fidan បានជួបជាមួយរដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ (Sergei Lavrov) កាលពីថ្ងៃទី១ ខែមីនា ក្នុងអំឡុងវេទិកានេះ ដោយប្រាប់អ្នកសារព័ត៌មានថា អ្នកទាំងពីរ បានពិភាក្សាគ្នាអំពីបញ្ហាជាច្រើន រួមទាំងសង្គ្រាមនៅអ៊ុយក្រែន នេះបើយោងតាមសារព័ត៌មានរ៉យទ័រ។

រដ្ឋមន្ត្រីការបរទេសរូបនេះ បានបន្ថែមថា ការបើកកិច្ចចរចាបទឈប់បាញ់ «មិនមែនមានន័យថា ការទទួលស្គាល់ការកាន់កាប់ (ដោយរុស្ស៊ី)នោះទេ ប៉ុន្តែបញ្ហានៃអធិបតេយ្យភាព និងបទឈប់បាញ់ គួរតែត្រូវបានពិភាក្សាដោយឡែកពីគ្នា»។

លោកFidan បានបញ្ជាក់ថា៖«ការស្លាប់ និងរបួសរបស់មនុស្សជាង ៥០០.០០០ នាក់ និងការបំផ្លិចបំផ្លាញទាំងស្រុងនៃហេដ្ឋារចនាសម្ព័ន្ធ និងរចនាសម្ព័ន្ធទំនើបរបស់ប្រទេសទាំងមូល មិនមែនជាការពិតដែលពួកយើងអាចទ្រាំទ្របាននោះទេ»។