ប្រទេសឥណ្ឌា ព្យាករពីសីតុណ្ហភាពក្តៅជាងធម្មតារហូតដល់ខែឧសភា ដែលបង្កការគំរាមកំហែងដល់ដំណាំ និងបង្កើនហានិភ័យ ដែលថាការទប់ស្កាត់របស់ប្រទេសនេះលើការនាំចេញគ្រាប់ធញ្ញជាតិ នឹងនៅតែមាន។

លោកបណ្ឌិត ម្រុតយ៉ុនចាយ ម៉ូហាផាត្រា (Mrutyunjay Mohapatra) អគ្គនាយកនៃនាយកដ្ឋានឧតុនិយមឥណ្ឌា បាននិយាយនៅក្នុងសន្និសីទសារព័ត៌មានមួយថា សីតុណ្ហភាពអតិបរិមាទំនងជាខ្ពស់ជាងធម្មតានៅក្នុងផ្នែកភាគច្រើននៃប្រទេសនេះ ហើយរលកកម្ដៅខ្លាំងជាងធម្មតាត្រូវបានគេឃើញក្នុងអំឡុងរយៈពេលបីខែរហូតដល់ខែឧសភា។

ការព្យាករណ៍នេះបង្កបញ្ហាប្រឈមថ្មីៗដល់រដ្ឋាភិបាល ដែលព្យាយាមរក្សាតម្លៃម្ហូបអាហារឱ្យស្ថិតក្រោមការត្រួតពិនិត្យនៅមុនការបោះឆ្នោតសកល ដោយការរឹតបន្តឹងការនាំចេញស្រូវសាលី អង្ករ និងស្ករ និងការលក់គ្រាប់ធញ្ញជាតិពីទុនបម្រុងរបស់រដ្ឋនៅក្នុងទីផ្សារក្នុងស្រុក។

នេះគឺជាឧទាហរណ៍មួយទៀតនៃបម្រែបម្រួលអាកាសធាតុ ដែលធ្វើឱ្យប្រទេសឥណ្ឌាងាយរងគ្រោះទៅនឹងព្រឹត្តិការណ៍អាកាសធាតុធ្ងន់ធ្ងរ។ ភាពញឹកញាប់ និងអាំងតង់ស៊ីតេនៃទឹកជំនន់ រលកកម្ដៅ និងគ្រោះរាំងស្ងួតបាននិងកំពុងកើនឡើង ហើយមនុស្សរាប់រយនាក់ត្រូវបានសម្លាប់ជារៀងរាល់ឆ្នាំនៅក្នុងប្រទេសនេះ៕