រដ្ឋមន្ត្រីសុខាភិបាលកូរ៉េខាងត្បូង នៅថ្ងៃចន្ទ (ទី៤ ខែមីនា) បាននិយាយថា អាជ្ញាធរនឹងចាប់ផ្តើមត្រួតពិនិត្យមន្ទីរពេទ្យនានា ដើម្បីចាត់វិធានការផ្លូវច្បាប់ ចំពោះគ្រូពេទ្យហាត់ការ ដែលបានព្រងើយកន្តើយនឹងឱសានវាទឲ្យបញ្ចប់ការដើរចេញមិនធ្វើការ ជុំវិញគម្រោងរបស់រដ្ឋាភិបាល ក្នុងការបង្កើនការចូលរៀននៅសាលាពេទ្យ។

គ្រូពេទ្យប្រចាំការ និងហាត់ការប្រមាណ ៩.០០០នាក់ ឬប្រហែល ៧ភាគរយនៃចំនួនសរុបរបស់ប្រទេស បាននាំគ្នាដើរចេញពីការងារ ចាប់ពីថ្ងៃទី២០ ខែកុម្ភៈ ដែលការធ្វើបែបនេះ បាននាំឲ្យមានការលុបចោលការវះកាត់ និងការព្យាបាលមួយចំនួន ហើយនិងធ្វើឲ្យប៉ះពាល់ដល់ផ្នែកសង្គ្រោះបន្ទាន់។

រដ្ឋាភិបាលបានព្រមានគ្រូពេទ្យដែលកំពុងតវ៉ានោះថា ពួកគេអាចប្រឈមនឹងការពិន័យផ្នែករដ្ឋបាល និងផ្លូវច្បាប់ ដោយក្នុងនោះរួមទាំងការព្យួរអាជ្ញាប័ណ្ណពេទ្យ និងការផាកពិន័យ ឬជាប់ពន្ធនាគារ ប្រសិនបើពួកគេមិនចូលធ្វើការវិញនៅចុងខែមុននោះទេ។

រដ្ឋមន្ត្រីក្រសួងសុខាភិបាល លោក Cho Kyoo-hong បានប្រាប់សន្និសីទតាមរយៈទូរទស្សន៍ថា៖ «ចាប់ពីថ្ងៃនេះទៅ យើងគ្រោងនឹងធ្វើការត្រួតពិនិត្យនៅនឹងកន្លែង ដើម្បីបញ្ជាក់ពីគ្រូពេទ្យហាត់ការ ដែលមិនបានត្រឡប់ចូលធ្វើការវិញវិញ ហើយចាត់វិធានការតាមច្បាប់ និងគោលការណ៍ ដោយគ្មានករណីលើកលែងនោះឡើយ។ សូមចងចាំថា គ្រូពេទ្យដែលមិនបានត្រឡប់ចូលធ្វើការវិញ អាចជួបប្រទះបញ្ហាធ្ងន់ធ្ងរ នៅលើវិថីអាជីពផ្ទាល់ខ្លួនរបស់ពួកគេ»។

ចំពោះការតវ៉ារបស់វេជ្ជបណ្ឌិតដែលត្រឡប់ទៅធ្វើការវិញ លោក Choo បាននិយាយថា រដ្ឋាភិបាលនឹងពិចារណាលើស្ថានសម្រាលទោសដែលថ្លឹងថ្លែងពីវិធានការណាមួយប្រឆាំងនឹងពួកគេ។

ជាមួយគ្នានេះ អនុរដ្ឋមន្ត្រីក្រសួងសុខាភិបាល លោក Park Min-soo បានប្រាប់សន្និសីទសារព័តមានថា រដ្ឋាភិបាលនឹងចាត់វិធានការ ដើម្បីព្យួរអាជ្ញាប័ណ្ណរបស់គ្រូពេទ្យហាត់ការប្រមាណ ៧.០០០នាក់ ដែលបានដើរចេញពីការការងាររបស់ពួកគេ៕