ការព្រួយបារម្ភកាន់តែច្រើនឡើងអំពីអាយុរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បង្កការគំរាមកំហែងយ៉ាងធ្ងន់ធ្ងរដល់កិច្ចប្រឹងប្រែងជាប់ឆ្នោតឡើងវិញរបស់លោក ដោយអ្នកបោះឆ្នោតភាគច្រើនដែលបានគាំទ្រលោក កាលពីឆ្នាំ២០២០ ឥឡូវនេះ និយាយថា លោកចាស់ពេកហើយមិនអាចដឹកនាំប្រទេសប្រកបដោយប្រសិទ្ធភាពបាននោះទេ។ នេះបើយោងតាមការស្ទង់មតិថ្មីមួយដោយសារព័ត៌មាន The New York Times និងមហាវិទ្យាល័យ Siena ។

ការស្ទង់មតិនេះបានចង្អុលបង្ហាញពីការផ្លាស់ប្តូរជាមូលដ្ឋានថា តើអ្នកបោះឆ្នោត ដែលបានគាំទ្រលោក បៃដិន ( Biden) កាលពី ៤ឆ្នាំមុន បានយល់ឃើញយ៉ាងណាចំពោះលោក។ អ្នកបោះឆ្នោត ៦១ភាគរយ បាននិយាយថា ពួកគេគិតថា លោកបៃដិន «ចាស់ពេកហើយ» មិនអាចក្លាយជាប្រធានាធិបតីដ៏មានប្រសិទ្ធភាពបានទេ។

ផ្នែកដ៏សំខាន់ ដែលបានបន្ថែមការព្រួយបារម្ភកាន់តែខ្លាំងឡើងនោះ គឺថា ១៩ភាគរយនៃអ្នកដែលបានបោះឆ្នោតឲ្យលោក បៃដិន ក្នុងឆ្នាំ២០២០ និង១៣ភាគរយនៃអ្នកបោះឆ្នោត ដែលបាននិយាយថា ពួកគេនឹងគាំទ្រលោក នៅក្នុងខែវិច្ឆិកា បានបញ្ជាក់ថា អាយុរបស់លោកប្រធានាធិបតី ៨១ឆ្នាំ គឺជាបញ្ហាដែលលោកលែងមានសមត្ថភាព ក្នុងការគ្រប់គ្រងការងារទៀតហើយ។ ការព្រួយបារម្ភអំពីអាយុបង្ហាញពីភាពបរាជ័យរបស់លោកប្រធានាធិបតីក្នុងការលុបបំបាត់ក្ដីបារម្ភទាំងនៅក្នុងគណបក្សរបស់លោកផ្ទាល់ និងការវាយប្រហាររបស់គណបក្សសាធារណរដ្ឋដែលហៅលោកថា ជាជនចាស់ជរា។

ក្នុងការស្ទង់មតិនេះ ៧៣ភាគរយនៃអ្នកចុះឈ្មោះបោះឆ្នោតទាំងអស់ បាននិយាយថា លោកចាស់ពេកមិនអាចអនុវត្តការងារឲ្យមានប្រសិទ្ធភាព ហើយ ៤៥ភាគរយបង្ហាញពីជំនឿរបស់ខ្លួនថា លោកមិនអាចធ្វើការងារបានទេ។ បញ្ហានេះ ដែលកើតមានជាយូរមកហើយទាំងនៅក្នុងការស្ទង់មតិ និងនៅក្នុងការសន្ទនាស្ងាត់ៗជាមួយមន្ត្រីរបស់គណបក្សប្រជាធិបតេយ្យ ហាក់ដូចជាកំពុងកើនឡើង នៅពេលដែលលោក បៃដិន ឆ្ពោះទៅរកការទទួលការតែងតាំងជាផ្លូវការពីគណបក្សរបស់លោក៕