ទីក្រុង Truckee រដ្ឋកាលីហ្វ័រនីញ៉ា ត្រូវបានគ្របដណ្តប់ទៅដោយព្រិល កាលពីថ្ងៃអាទិត្យ ហើយស្ថានភាពព្យុះព្រិល នៅតំបន់ជួរភ្នំ Sierra Nevada ត្រូវបានគេរំពឹងថា បន្តធ្លាក់រហូតដល់ថ្ងៃចន្ទនេះ។

ទីក្រុងជាច្រើន នៅតាមបណ្តោយព្រំដែន ណេវ៉ាដា-កាលីហ្វ័រនីញ៉ា បានទទួលរងព្រិលធ្លាក់ខ្លាំង កាលពីចុងសប្តាហ៍កន្លងទៅនេះ ដោយបានបិទផ្លូវហាយវ៉េ ក្នុងរដ្ឋណេវ៉ាដា ខណៈអ្នកព្យាករណ៍អាកាសធាតុបានព្រមាន ហានិភ័យខ្ពស់នៃផ្ទាំងទឹកកក។

អង្គភាពល្បាតផ្លូវហាវ៉េ រដ្ឋកាលីហ្វ័រនីញ៉ា បាននិយាយថា អន្តររដ្ឋចំនួន៨០ ត្រូវបានបិទ រវាងទីក្រុង Colfax និងរដ្ឋ Nevada ចាប់តាំងពីថ្ងៃសុក្រ ខណៈខ្យល់ខ្លាំងវាយបោកបក់ជាមួយព្យុះព្រិល។

អង្គភាពសេវាអាកាសធាតុជាតិ បានព្រមានពីសន្ទុះខ្យល់ខ្លាំងរហូតដល់ ៧២គីឡូម៉ែត្រក្នុងមួយម៉ោង ហើយស្ថានភាពព្យុះព្រិល មានកំណើនខ្ពស់នៅតំបន់ភ្នំ រហូតដល់យប់ថ្ងៃអាទិត្យ។ ជាមួយគ្នានេះ រមណីយដ្ឋានជិះស្គី នៅជុំវិញតំបន់បឹង Tahoe ត្រូវាបានបិទ។

អង្គភាពសេវាអាកាសធាតុជាតិបាននិយាយថា ព្រិលកម្រាស់ជាង២ម៉ែត្រ បានគរលើគ្នា ចាប់តាំងពីថ្ងៃសុក្រ ក្នុងទីក្រុង Soda Springs ទីក្រុង Sugar Bowl និងទីក្រុងតំបន់ភ្នំផ្សេងទៀត។