ប្រធានទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ បានព្រមានកាលពីថ្ងៃចន្ទ អំពី «យុទ្ធនាការរួមគ្នា និងដោយចេតនា» ក្នុងគោលបំណងបញ្ចប់ប្រតិបត្តិការរបស់ខ្លួន ខណៈប្រទេសអ៊ីស្រាអែល បានចោទប្រកាន់ទីភ្នាក់ងារនេះពីបទថា បានជួលប្រតិបត្តិការយោធាជាង៤៥០នាក់ មកពីក្រុមហាម៉ាស និងក្រុមប្រដាប់អាវុធផ្សេងទៀត។

លោក ហ្វីលីព ឡាហ្សារីនី(Philippe Lazzarini) មិនបានបញ្ជាក់ច្បាស់ចំពោះការចោទប្រកាន់ចុងក្រោយ ដែលបានធ្វើឡើងដោយយោធាអ៊ីស្រាអែល កាលពីថ្ងៃចន្ទនោះទេ ប៉ុន្តែលោកបានអំពាវនាវដល់នាយករដ្ឋមន្ត្រី លោក Benjamin Netanyahu សម្រាប់ការបញ្ជាក់ដោយបើកចំហថា ទីភ្នាក់ងារ UNRWA នឹងពុំក្លាយជាផ្នែកមួយ ក្រោយសង្គ្រាមនៅតំបន់ហ្កាហ្សា នោះទេ។

លោក Lazzarini បានប្រាប់សភាដែលមានសមាជិក ១៩៣រូប ថាទីភ្នាក់ងារ UNRWA កំពុង ដំណើរការក្នុងស្ថានភាពលំបាកខ្លាំង បន្ទាប់ពីប្រទេសចំនួន១៦ បានផ្អាកការផ្តល់មូលនិធិសរុបចំនួន ៤៥០ លានដុល្លារ នៅពេលដែលប្រទេសអ៊ីស្រាអែល កាលពីខែមករា បានចោទប្រកាន់បុគ្គលិកទីភ្នាក់ងារ UNRWA ចំនួន ១២ នាក់ ថាបានចូលរួមក្នុងការវាយប្រហារកាលពីថ្ងៃទី ៧ ខែតុលា ជាមួយក្រុមសកម្មប្រយុទ្ធហាម៉ាស។ បុគ្គលិកទីភ្នាក់ងារ UNRWA ត្រូវបានបណ្តេញចេញ ហើយការស៊ើបអង្កេតផ្ទៃក្នុងឯករាជ្យរបស់អង្គការសហប្រជាជាតិ ក៏បានចាប់ផ្តើម។

ទីភ្នាក់ងារ UNRWA បានផ្តល់ការងារដល់មនុស្ស ១៣.០០០នាក់នៅតំបន់ហ្កាហ្សា ដែលដំណើរការនៅតាមសាលារៀន គ្លីនិកថែទាំសុខភាព និងសេវាសង្គមផ្សេងៗទៀត ព្រមទាំងការចែកចាយជំនួយមនុស្សធម៌។ អង្គការសហប្រជាជាតិ បាននិយាយថាបច្ចុប្បន្នមនុស្សប្រហែល ៣.០០០នាក់ នៅតែធ្វើការដើម្បីផ្តល់ជំនួយនៅក្នុងតំបន់ហ្កាហ្សា ជាកន្លែងដែលមនុស្ស ៥៧៦.០០០នាក់ មួយភាគបួននៃចំនួនប្រជាជន បានឈានចេញមួយជំហានពីគ្រោះទុរ្ភិក្ស។