ដោយសារប្រទេសកម្ពុជា បានកំពុងពង្រីកទីផ្សារជាបន្តបន្ទាប់ តាមរយៈ​កិច្ចព្រមព្រៀ​ង​ភាព​ជា​ដៃគូ​សេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរី ជាមួយ​ភាគី​ចិន កូរ៉េ និងអេមីរ៉ាតអារ៉ាប់រួមជាដើម ដូច្នេះក្រសួង​ពាណិជ្ជកម្ម​បាន​រំពឹងថា​នៅ​ថ្ងៃ​អនាគត​ទីផ្សា​រ​ពាណិជ្ជកម្មរបស់កម្ពុជានឹងមានទំហំកាន់តែច្រើន ក៏ប៉ុន្ដែជា​កង្វល់​គឺ​បញ្ហា​ខ្វះខាត​ទំនិញ​ក្នុង​ការ​នាំចេញ។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម ក្នុង​សន្និសីទ​សារ​ព័ត៌មាន អំពីសមិទ្ធផលសំខាន់ៗដែលសម្រេចបានក្នុងរយៈពេល ៦ខែ ដែល​ដឹកនាំ​ដោយ​រាជ​រដ្ឋាភិបាល អាណត្តិទី៧ នៃរដ្ឋសភា កាលពីរសៀលថ្ងៃទី៤ ខែមីនា ឆ្នាំ២០២៤កន្លងទៅ បាន​មាន​ប្រសាសន៍​ថា ឥឡូវនេះកម្ពុជាមានទីផ្សារហើយជាទីផ្សារសេរីទៅទៀត។

ឯកឧត្តមបានបន្តថា ក្នុងអំឡុង​អម​ដំណើរ​បំពេញ​បេសកម្ម​ការងារ​ជា​មួយ​ថ្នាក់​ដឹកនាំ​ទៅកា​ន់​ប្រទេស​ចិន កាលពីខែតុលា ឆ្នាំ២០២៣កន្លងទៅ លោកជំទាវ ចម និម្មល រដ្ឋមន្រ្តី​ក្រសួង​ពាណិជ្ជ​កម្ម បានចុះហត្ថលេខាអនុស្សារណៈជាមួយក្រុមហ៊ុនចិនធំមួយ ដើម្បីបង្កើតសួនឧស្សាហកម្ម ដែលមានលក្ខណៈខុសពីតំបន់សេដ្ឋកិច្ចពិសេស ពីព្រោះតំបន់សួនឧស្សាហកម្មនេះ គឺ​ផ្តោត​ទៅ​លើ​ឧស្សាហកម្មដែលតម្លៃបន្ថែមខ្ពស់ អញ្ចឹងហើយ​បាន​ជា​រដ្ឋាភិបាល​បារម្ភ​ខ្លាច​អត់​មាន​ទំនិញ​លក់​ឲ្យ​គេ ដែលរដ្ឋតែងតែអំពាវនាវដល់ធុរជន ផលិតករ ឲ្យធ្វើយ៉ាង​ដូច​ម្តេច​ខិតខំ​ផលិត​ទំនិញ​មាន​គុណភាព ឆ្លើយតបតម្រូវការទីផ្សារឲ្យមាននិរន្តភាពក្នុងការផ្គត់ផ្គង់ និងមាន​និរន្តភាព​គុណភាព​។

ឯកឧត្តម ប៉ែនសុវិជាតិ បានបញ្ជាក់​បន្ថែម​អំពី​កិច្ច​ប្រជុំ​អនុ​គណៈកម្មការ​សេដ្ឋកិច្ច​ក្នុង​តំបន់​អភិវឌ្ឍន៍​ត្រី​កោណក​ម្ពុជា ឡាវ និងវៀតណាម (CLV-DTA) លើកទី១២ ដែលបាន​ចាប់​ផ្តើម​នៅ​ប្រទេស​ឡាវ កាលពីចុងខែកុម្ភៈកន្លងទៅនេះ អង្គប្រជុំក៏បាន​ផ្តោត​លើ​ការ​ពិនិត្យ​ឡើង​វិញ​ទៅ​លើ​លទ្ធផល​ការងារដែលសម្រេចបានក្នុងពេលកន្លងមក ជាពិសេសកា​រ​រៀបចំ​តាក់​តែង​ផែន​ការ​សកម្ម​ភាព​តភ្ជាប់​សេដ្ឋកិច្ចរវាងប្រទេសទាំង៣ដល់ឆ្នាំ២០៣០ខាងមុខ។

 យោងតាមអគ្គនាយកដ្ឋានគយ និងរដ្ឋាករកម្ពុជា គិតក្នុងរយៈពេល១ខែដំបូង ដើមឆ្នាំ២០២៤​នេះ ការធ្វើពាណិជ្ជកម្មរបស់កម្ពុជាជាមួយបណ្តាដៃគូសំខាន់ៗ មានទំហំទឹកប្រាក់ប្រមាណជាង ៤ពាន់​លាន​ដុល្លារ កើនឡើងជិត ១៧% ប្រៀបធៀបរយៈពេលដូចគ្នាទៅនឹងឆ្នាំ២០២៣៕ អត្ថបទ៖ ឈិត បូរ៉ាវី