អភិបាលរាជធានីភ្នំពេញជំរុញឲ្យគ្រូបង្រៀនលះបង់ថែមទៀត ដើម្បីមានធនធានមនុស្សឆ្ពោះ​ទៅ​សម្រេច​បាន​នូវចក្ខុវិស័យចំណូលមធ្យមកម្រិតខ្ពស់នៅឆ្នាំ២០៣០ និង​ក្លាយ​ជា​ប្រទេស​មាន​ចំណូល​ខ្ពស់​នៅឆ្នាំ២០៥០។

ថ្លែងក្នុងពិធីបិទសន្និបាទបូកសរុបវាយតម្លៃលទ្ធផលការងារអប់រំ យុវជន និងកីទ្បារាជធានីភ្នំពេញ ឆ្នាំសិក្សា ២០២២-២០២៣ និងលើកទិសដៅការងារឆ្នាំសិក្សា ២០២៣-២០២៤ នា​ព្រឹក​ថ្ងៃ​ទី​០៥ ខែមីនា ឆ្នាំ២០២៤ នៅមន្ទីរអប់រំ យុវជន និងកីទ្បារាជធានីភ្នំពេញ ឯកឧត្តម ឃួង ស្រេង អភិបាល​រាជធានីភ្នំពេញ បានមានប្រសាសន៍ថា វិស័យអប់រំ​សព្វថ្ងៃ​ត្រូវ​បាន​ទទួល​ស្គាល់​ជា​លក្ខណៈ​អន្តរជាតិ ដែលជាជោគជ័យយ៉ាងធំធេងលើវិស័យអប់រំនេះ ប៉ុន្តែកុំភ្លេចខ្លួន​ចំពោះ​ភាព​ជោគ​ជ័យ​នេះ ដោយត្រូវរួមគ្នាបន្តធ្វើយ៉ាងណាឲ្យវិស័យអប់រំកាន់តែជោគជ័យថែមទៀត និង​ធ្វើ​ឲ្យ​កម្ពុជា​សម្រេច​បាននូវចក្ខុវិស័យជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និង​ក្លាយ​ជា​ប្រទេស​មានចំណូលខ្ពស់នៅឆ្នាំ ២០៥០។

ឯកឧត្តម ឃួង ស្រេង ក៏បានជម្រាបជូនលោកគ្រូ អ្នកគ្រូ​ឲ្យ​ជឿជាក់​លើ​ការ​ដឹកនាំ​របស់​សម្ដេច​មហា​បវរធិបតី ហ៊ុន ម៉ាណែត នាយករដ្ឋមន្ត្រី និងបានជំរុញឲ្យលោកគ្រូ អ្នកគ្រូទាំងអស់​ចូលរួម​អនុវត្ត​គោល​នយោបាយភូមិ សង្កាត់មានសុវត្ថិភាព​ តាមរយៈ​ច​ង​ជា​គ្រុប​តេឡេក្រាម​មួយ​រវាង​អាជ្ញាធរ​ កងកម្លាំងមានសមត្ថកិច្ច និងលោកគ្រូ អ្នកគ្រូនៅតាមគ្រឹះស្ថានសិក្សា ពោលគឺ​នៅ​ពេល​មាន​បញ្ហា​អ្វី​មួយគឺអាចរួមគ្នាដោះស្រាយបានភ្លាមៗតែម្ដង។ លោកគ្រូ អ្នកគ្រូត្រូវលះបង់​បន្ថែម​ទៀត​ទៅ​តាម​យុទ្ធសាស្ត្របច្ចកោណរបស់រាជរដ្ឋាភិបាលដឹកនាំដោយសម្ដេចមហាវបរធិបតី ហ៊ុន ម៉ាណែត ក្នុងការអភិវឌ្ឍន៍ធនធានមនុស្ស បើគ្មានធនធានមនុស្ស គឺមិនអាច​អភិវឌ្ឍ​ប្រទេស​ឲ្យ​រីក​ចម្រើន​បាន​នោះទេ។ បច្ចុប្បន្ននេះទីផ្សារការងារកំពុងមានការប្រកួតប្រជែងគ្នាខ្លាំង ទាមទារ​ត្រូវ​មាន​ធន​ធាន​មនុស្សខ្លាំងដែរ។

លោក ហែម ស៊ីណារ៉ត ប្រធានមន្ទីរអប់រំ យុវជន និងកីឡារាជធានីភ្នំពេញ បានលើកឡើងថា អង្គ​សន្និបា​ត​បានធ្វើឡើងក្នុងរយៈមួយថ្ងៃកន្លះនេះ ដោយបានដំណើរ​ការ​ពិភាក្សា​រួមគ្នា​លើ​សេចក្តី​ព្រាង​របាយការណ៍ ទិសដៅ និងពិភាក្សាប្រធានបទសំខាន់ៗចំនួន៨ ទៅតាមអនុវិស័យទាំង៦ គឺ​អ​នុវិស័យអប់រំកុមារតូច អនុវិស័យបឋមសិក្សា អនុវិស័យមធ្យមសិក្សានិងអប់រំបច្ចេកទេស អនុ​វិស័យអប់រំក្រៅប្រព័ន្ធ អនុវិស័យអប់រំកាយនិងកីឡា និងអនុវិស័យការអភិវឌ្ឍយុវជន ដោយ​ឆ្លុះប​ញ្ចាំង​ពី​ចំណុចខ្លាំង ចំណុចសេសសល់ដែលបានអនុវត្តកន្លងមក ដើម្បីជា​មូលដ្ឋាន​លើក​ទិស​ដៅ​អនុវត្ត​បន្ត ដោយបើកទូលាយជូនមន្ត្រីគ្រប់គ្រងអប់រំគ្រប់លំដាប់ថ្នាក់ ដៃគូអភិវឌ្ឍន៍​បាន​ចូល​រួម​ផ្ដល់​យោបល់​៕ អត្ថបទ៖ ប្រាក់ វ៉ាន់ដា