អង្គការសមាគមនៃបណ្តុំអង្គការសង្គមស៊ីវិល នៅថ្ងៃទី៥ ខែមីនា ឆ្នាំ២០២៤នេះ បាន​ថ្លែងការណ៍​គាំទ្រ​លទ្ធផលផ្លូវការ នៃការបោះឆ្នោតជ្រើសតាំងតំណាងសមាជិកព្រឹទ្ធសភា នីតិកាលទី៥ ដែល​ប្រកាស​ដោយ គ.ជ.ប នាព្រឹកមិញនេះ។

អង្គការសមាគមនៃបណ្តុំអង្គការសង្គមស៊ីវិល បានមើលឃើញថាការបោះឆ្នោតជ្រើសតាំង សមាជិក​​ព្រឹទ្ធសភា នីតិកាលទី៥ កាលពីថ្ងៃទី២៥ ខែកុម្ភៈ ឆ្នាំ២០២៤ បានប្រព្រឹត្ត​ទៅ​ស្រប​តាម​រដ្ឋ​ធម្មនុញ្ញ និងច្បាប់នៃព្រះរាជាណាចក្រកម្ពុជា និងប្រកបដោយលក្ខណៈសេរីត្រឹមត្រូវ និង​យុត្តិធម៌ ក្នុងបរិយាកាសអព្យាក្រឹត សន្តិសុខ របៀបរៀបរយ គ្មានអំពើហិង្សា និងការ​គំរាម​កំហែង​។          

លទ្ធផលផ្លូវការនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ បាន​ប្រកាស​ជា​ផ្លូវ​ការ​ នៅព្រឹកថ្ងៃទី៥ ខែមីនា ឆ្នាំ២០២៤ ចំនួន ៦២អាសនៈ ដែល​មាន​ការ​ចូលរួម​ពី​គណបក្ស​ធំ​ចំនួន​ ៤ចូលរួម ប្រកួតប្រជែង ក្នុងនោះ គណបក្សប្រជាជនកម្ពុជាទទួលបាន ៥៥ អាសនៈ, គណបក្ស​ឆន្ទៈខ្មែរ ទទួលបាន ៣ អាសនៈ, គណបក្សហ៊្វុនស៊ិនប៉ិច និងគណបក្សកម្លាំងជាតិ ពុំ​ទ​​ទួលបាន អាសនៈទេ, ចំណែកអាសនៈតែងតាំងដោយព្រះមហាក្សត្រចំនួន ២ អាសនៈ និង​បោះឆ្នោត​ជ្រើសតាំងដោយរដ្ឋសភាចំនួន២អាសនៈ។  

អង្គការសមាគមនៃបណ្តុំអង្គការសង្គមស៊ីវិលលើកឡើងថា ការ​បោះឆ្នោត​ជ្រើស​តាំង​សមាជិក​ព្រឹទ្ធសភា ត្រូវជ្រើសតាំងតាមរយៈការបោះឆ្នោតអសកល ដោយអង្គ​បោះឆ្នោត​ជា​សមាជិក​ក្រុម​ប្រឹក្សា​ឃុំ-សង្កាត់ និងសមាជិករដ្ឋសភាក្នុងមុខតំណែង។

អង្គការសមាគមនៃបណ្តុំអង្គការសង្គមស៊ីវិល វាយតម្លៃខ្ពស់​ចំពោះ​ការ​យក​ចិត្ត​ទុកដាក់​របស់​រាជ​រដ្ឋាភិបាល គណៈកម្មធិការជាតិរៀបចំការបោះឆ្នោត គ្រប់បណ្តាអង្គការ សមាគម មិនមែន​រដ្ឋាភិបាល​ អ្នកសង្កេតការជាតិ និងអន្តរជាតិ ដែលបានប្រកាន់យ៉ាងខ្ជាប់ខ្ជូននូវជំហរ ឯករាជ្យ អព្យាក្រឹត្យ តម្លាភាព និងយុត្តិធម៌ ធ្វើឱ្យដំណើរ​ការ​នៃ​ការ​បោះឆ្នោត​ជ្រើស​តាំង​សមាជិក​ព្រឹទ្ធសភា​ នីតិកាល​ទី៥ ប្រព្រឹត្តិយ៉ាងរលូនស្របតាម រដ្ឋធម្មនុញ្ញ នីតិវិធី និងក្រមសីលធម៌។

អង្គការសមាគមនៃបណ្តុំអង្គការសង្គមស៊ីវិល គាំទ្រទាំងស្រុងនូវលទ្ធផល​នៃការ​បោះឆ្នោត​ជ្រើស​តាំង​សមាជិក​ព្រឹទ្ធសភា នីតិកាលទី៥ ពិតជាបានឆ្លុះបញ្ចាំងនូវឆន្ទៈដ៏ថ្លៃថ្លា និងមោះមុត​របស់​ប្រជាជន​កម្ពុជា​ទូទាំងប្រទេសដែលមានក្រុមប្រឹក្សាឃុំ-សង្កាត់ និងសមាជិករដ្ឋសភា នីតិកាលទី៧ ជាតំណាង ដើម្បីពង្រឹងសាមគ្គីភាព ឯកភាពជាតិ ថែរក្សាសន្តិភាព ស្ថេរភាពនយោបាយ សន្តិសុខ សណ្តាប់​ធ្នាប់សាធារណៈ ការពារឯករាជ្យ អធិបតេយ្យភាព និងបូរណៈភាពទឹកដី រក្សាឱ្យបាន​នូវ​របប​រាជា​និយមអាស្រ័យរដ្ឋធម្មនុញ្ញ លើកស្ទួយលទ្ធិប្រជាធិបតេយ្យ និងនីតិរដ្ឋ ពិសេសបន្ត​ជំរុញ​ការ​អភិវឌ្ឍ​ប្រទេសជាតិឱ្យកាន់តែរីកចម្រើន ប្រជាជនមានជីវភាពធូរធា រស់នៅយ៉ា​ង​សម្បូរ​សប្បាយ និងសេចក្តីសុខដុមរមនាតទៅមុខទៀត៕