ប្រទេសចិន នឹងធ្វើឱ្យប្រសើរឡើងនូវគោលនយោបាយគាំទ្រដល់ការសម្រាលកូន នេះបើយោងតាមរបាយការណ៍ផ្លូវការរបស់រដ្ឋាភិបាលចំនួនពីរបាននិយាយនៅថ្ងៃអង្គារ (០៥ មីនា) នេះ ដែលរៀបរាប់លម្អិតអំពីផែនការជួយគាំទ្រដល់កំណើនប្រជាជនវ័យចំណាស់ តាមរយៈការបង្កើនអត្ថប្រយោជន៍ និងប្រាក់សោធននិវត្តន៍មូលដ្ឋាន និងការជំរុញឱ្យមានប្រព័ន្ធសោធនឯកជន។

វិធានការនេះកើតឡើងបន្ទាប់ពីចំនួនប្រជាជនរបស់ប្រទេសចិន បានធ្លាក់ចុះជាលើកទីពីរជាប់ៗគ្នាក្នុងឆ្នាំ២០២៣ ដោយអត្រាកើតថ្មីបានធ្លាក់ចុះដល់ពាក់កណ្តាលនៃអត្រាកើតក្នុងឆ្នាំ២០១៦ ខណៈពេលដែលចំនួនអ្នករៀបអាពាហ៍ពិពាហ៍បានធ្លាក់ចុះយ៉ាងខ្លាំងក្នុងឆ្នាំ២០២២។

របាយការណ៍ដែលចេញផ្សាយដោយអ្នករៀបចំផែនការរដ្ឋបាននិយាយថា ប្រទេសចិននឹង «ធ្វើការឆ្ពោះទៅរកសង្គមមេត្រីភាពកំណើត និងលើកកម្ពស់ការអភិវឌ្ឍចំនួនប្រជាជនរយៈពេលវែង និងប្រកបដោយតុល្យភាព» និងអភិវឌ្ឍ «ការមើលថែទាំកុមារជាប្រយោជន៍សាធារណៈ» ដើម្បីកាត់បន្ថយការចំណាយលើការសម្រាលកូន ការចិញ្ចឹមបីបាច់ និងការអប់រំ។

ការធ្លាក់ចុះនៃប្រជាសាស្រ្តរបស់ប្រទេសចិន ភាគច្រើនគឺជាលទ្ធផលនៃគោលនយោបាយមានកូនតែមួយរបស់ខ្លួន ដែលបានដាក់នៅចន្លោះឆ្នាំ១៩៨០ និងឆ្នាំ២០១៥ ប៉ុន្តែចាប់តាំងពីឆ្នាំ២០២១ មក ប្ដីប្រពន្ធមួយគូរត្រូវបានអនុញ្ញាតឱ្យមានកូនរហូតដល់បីនាក់៕