រដ្ឋមន្ត្រីក្រសួងអភិវឌ្ឍន៍អាល្លឺម៉ង់ លោកស្រី Svenja Schulze បានព្រមានថា ភេរវកម្មអ៊ីស្លាម និងមហិច្ឆតារបស់រុស្ស៊ី កំពុងគំរាមកំហែងតំបន់សាហែល (Sahel) នៅអនុតំបន់សាហារ៉ាអាហ្រ្វិក មុនពេល លោកស្រីចេញដំណើរទៅចូលរួមកិច្ចពិភាក្សានយោបាយ នៅប្រទេសប៊ួគីណាហ្វាសូ ( Burkina Faso) និង ប៊េនីន (Benin) ។

កាលពីថ្ងៃចន្ទ លោកស្រី Schulze នឹងក្លាយជារដ្ឋមន្ត្រីអឺរ៉ុបដំបូងគេដែលធ្វើទស្សនកិច្ចនៅប្រទេសប៊ួគីណាហ្វាសូ ចាប់តាំងពីរដ្ឋប្រហារយោធាក្នុងខែកញ្ញា ឆ្នាំ ២០២២ ដែលបានដំឡើងលោក Ibrahim Traoré ជាមេដឹកនាំប្រទេសនេះ។

លោកស្រី Schulze គឺជាប្រធាននៃសម្ព័ន្ធតំបន់សាហែល ដែលត្រូវបានបង្កើតឡើងដោយប្រទេសអាល្លឺម៉ង់ បារាំង និងសហភាពអឺរ៉ុប ដើម្បីគាំទ្របណ្តារដ្ឋសាហែល។ ប្រទេសអាល្លឺម៉ង់ គឺជាម្ចាស់ជំនួយធំជាងគេទី៤ដល់ស្ថាប័នអភិវឌ្ឍន៍។

ប្រទេសប៊ួគីណាហ្វាសូ ជាប្រទេសគ្មានព្រំដែនសមុទ្រ ដែលមានប្រជាជនប្រហែល ២៣លាននាក់ ត្រូវបានរងការវាយប្រហារជាច្រើនឆ្នាំ ដោយក្រុមភេរវកម្មអ៊ីស្លាម ដែលកំពុងផ្លាស់ទីទៅជិតរដ្ឋធានីអៅហ្គាឌូហ្គូ (Ouagadougou)។ មនុស្សរាប់ម៉ឺននាក់ បានត្រូវគេសម្លាប់កាលពីឆ្នាំមុន។

រដ្ឋាភិបាលយោធាអន្តរកាល ដែលដឹកនាំដោយលោក Traoré គ្រប់គ្រងតែពាក់កណ្តាលនៃទឹកដីរបស់ប្រទេស ហើយបានពន្យារពេលការបោះឆ្នោតដែលបានសន្យាសម្រាប់ឆ្នាំនេះ ដោយគ្មានការកំណត់ពេលជាក់លាក់។ មនុស្សជាង ២លាននាក់ ត្រូវបានគេប៉ាន់ស្មានថា ត្រូវបានជម្លៀសចេញពីផ្ទះសម្បែងរបស់ពួកគេ។