ភ្នំពេញ ៖ ខណៈនៅថ្ងៃទី៥ ខែមីនានេះ គណៈកម្មាធិការជាតិរៀបចំការបោះឆ្នោត គ.ជ.ប បានប្រកាសលទ្ធផលផ្លូវការ ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ក្នុងនោះគណបក្សប្រជាជនកម្ពុជាទទួលបាន៥៥អាសនៈ។ បណ្តាពលរដ្ឋ នៅរាជធានីភ្នំពេញ បានចាត់ទុកការបោះឆ្នោតនេះមានដំណើរការល្អ សុក្រឹតភាព យុត្តិធម៌ តឹ្រមត្រូវ ស្របតាមរដ្ឋធម្មនុញ្ញនៃព្រះរាជាណចក្រកម្ពុជា។

​ពលរដ្ឋលើកឡើងថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ ដែលបានប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ គឺមានដំណើរការល្អ មានសុក្រឹតភាព យុត្តិធម៌ តឹ្រមត្រូវ ខណៈ បណ្តាគណបក្សនយោបាយនានា គ្នានការតវ៉ាលើផ្នែកណាមួយនោះទេ គ្រប់ភាគីអង្គបោះឆ្នោតទាំងអស់គឺបាននាំគ្នាចូលរួមបោះឆ្នោត ក្នុងទឹកមុខសប្បាយរីករាយ ស្ថានភាពសន្តិសុខ សណ្តាប់ធ្នាប់មានភាពស្ងប់ស្ងាត់មិនមានបាតុភាពណាមួយកើតឡើងឡើយចាប់តាំងពីយុទ្ធនាការឃោសនាបោះឆ្នោត រហូតដល់ការប្រកាសលទ្ធផលជាផ្លូវការនៅថ្ងៃទី៥ ខែមីនានេះ។ 

ពលរដ្ឋ រំពឹងថា សមាជិកព្រឹទ្ធសភា មកពីបណ្តាគណៈបក្សនយោបាយនានា នឹងធ្វើការងាររួមគ្នាបានល្អប្រសើរ និងធ្វើការសម្របសម្រួលស្ថាប័នរាជរដ្ឋាភិបាល និងស្ថាប័នរដ្ឋសភា ជំរុញការអនុវត្តច្បាប់ អនុវត្តគោលនយោបាយអភិវឌ្ឍឃុំសង្កាត់បន្តការរីកចម្រើនថែមទៀត។

សូមបញ្ជាក់ថា ការបោះឆ្នោតជ្រើសតាំងសមាជិកព្រឹទ្ធសភាកាលពីថ្ងៃទី២៥ ខែកុម្ភៈ ឆ្នាំ២០២៤ គ.ជ.ប បានរៀបចំការិយាល័យបោះឆ្នោតចំនួន៣៣ ហើយនៅក្នុងចំណោមអង្គបោះឆ្នោតសរុប ១១៧៤៧ នាក់ គឺមានអង្គបោះឆ្នោតបានចូលរួមបោះឆ្នោតចំនួន១១៧៣០នាក់ ស្មើនឹង ៩៩.៨៦% ជាលទ្ធផល ក្នុងចំណោមអាសនៈចំនួន ៦២ គឺគណបក្សប្រជាជនកម្ពុជា ទទួលបាន ៥៥ អាសនៈ គណបក្សឆន្ទៈខ្មែរ ទទួលបាន៣អសនៈ ហើយគណៈបក្ស២ផ្សេងទៀត ពុំទទួលបានអសនៈនោះទេ៕ អត្ថបទ ៖ ស៊ុម សុខជា