ក្រុមអ្នកជំនាញរបស់អង្គការសហប្រជាជាតិ បាននិយាយកាលពីថ្ងៃចន្ទថា កេរ្តិ៍ដំណែលនៃការសាកល្បងនុយក្លេអ៊ែរ គឺជាបញ្ហាសកល ដោយមានផលប៉ះពាល់សិទ្ធិមនុស្សយ៉ាងខ្លាំង។ នៅក្នុងសេចក្តីថ្លែងការណ៍ ដែលត្រូវបានចេញផ្សាយមុនទិវាអន្តរជាតិសម្រាប់ការរំសាយនិងការមិនរីកសាយអាវុធ នៅថ្ងៃទី ៥ ខែមីនា នេះ អ្នកជំនាញបានបញ្ជាក់ថា ការសាកល្បងនុយក្លេអ៊ែរ មិនត្រឹមតែប៉ះពាល់ដល់មនុស្សដែលបង្កដោយសារធាតុវិទ្យុសកម្មនុយក្លេអ៊ែរ និងសំណល់កាលពីពេលអតីតកាលប៉ុណ្ណោះទេ ប៉ុន្តែ នឹងបន្តជះឥទ្ធិពលអវិជ្ជមានដល់សិទ្ធិមនុស្ស នៃអ្នកជំនាន់បច្ចុប្បន្ន និងជំនាន់ក្រោយ។

នៅខែមីនា នេះ ក៏ជាខួបលើកទី ៧០ នៃការសាកល្បងនុយក្លេអ៊ែរ កា សល ប្រាវ៉ូ(Castle Bravo) នៅលើកោះ Bikini Atoll នៅប្រជុំកោះ Marshall តំបន់ប៉ាស៊ីហ្វិកភាគពាយព្យ។ ចន្លោះឆ្នាំ ១៩៤៦ និង ១៩៥៨ អាវុធនុយក្លេអ៊ែរ ដែលគេបានស្គាល់ចំនួន ៦៧គ្រាប់ ត្រូវបានសាកល្បងនៅកោះ Marshall ដោយសហរដ្ឋអាមេរិក។ យោងតាមសេចក្តីសម្រេចរបស់ក្រុមប្រឹក្សាសិទ្ធិមនុស្សបានឲ្យដឹងថា សំណល់នុយក្លេអ៊ែរពុល និងសារធាតុវិទ្យុសកម្មនុយក្លេអ៊ែរ និងការបំពុលខ្យល់ មានមកតាំងពីទសវត្សរ៍មុនៗ នៅតែបន្តប៉ះពាល់ដល់សិទ្ធិរបស់ប្រជាជននៅ កោះ Marshall។ យោងតាមសេចក្តីថ្លែងការណ៍បានឲ្យដឹងថា ទិវាអន្តរជាតិសម្រាប់ការរំសាយនិងមិនរីកសាយអាវុធ គឺជាពេលវេលាសម្រាប់ការឆ្លុះបញ្ចាំងជាសកល ដោយអំពាវនាវឱ្យមានការរំសាយអាវុធជាទូទៅ និងពេញលេញ។

អ្នកជំនាញបាននិយាយនៅក្នុងសេចក្តីថ្លែងការណ៍ថា «រួមគ្នា ក្នុងការប្រឈមទៅនឹងកេរ្តិ៍ដំណែលនុយក្លេអ៊ែរ និងជម្លោះដែលកំពុងបន្ត យើងត្រូវតែទទួលបានការរំសាយ និងមិនរីកសាយអាវុធ ដើម្បីធានាបានសិទ្ធិមនុស្សសម្រាប់ទាំងអស់គ្នា និងអនាគតប្រកបដោយចីរភាព។