នាយករដ្ឋមន្ត្រីអូស្ត្រាលីលោក Anthony Albanese នៅថ្ងៃអង្គារ (ទី៥ ខែមីនា) បាននិយាយថា ប្រទេសរបស់លោកនឹងបង្កើតមូលនិធិចំនួន ២ពាន់លានដុល្លារអូស្ត្រាលី (១,៣ពាន់លានដុល្លារអាមេរិក) ដើម្បីជួយលើកស្ទួយពាណិជ្ជកម្ម និងការវិនិយោគពីរផ្លូវជាមួយបណ្ដាប្រទេសក្នុងតំបន់អាស៊ីអាគ្នេយ៍។

ការសម្របសម្រួលផ្តល់ហិរញ្ញប្បទានវិនិយោគអាស៊ីអាគ្នេយ៍ នឹងផ្តោតលើហេដ្ឋារចនាសម្ព័ន្ធ និងគម្រោងផ្លាស់ប្តូរសេដ្ឋកិច្ចបៃតង។ លោក Albanese បាននិយាយថា លោកចង់ធ្វើឲ្យប្រាកដថា ក្រុមហ៊ុននៅតំបន់អាស៊ីអាគ្នេយ៍អាចចូលទៅកាន់ទីផ្សារអូស្ត្រាលីបាន ខណៈដែលលោកហៅអូស្ត្រាលីថា ជា «អ្នកនាំចេញចំណេះដឹង និងជាអ្នកចែករំលែកជំនាញ»។

លោក Albanese ដែលកំពុងធ្វើជាម្ចាស់ផ្ទះទទួលបណ្ដាមេដឹកនាំមកពីសមាគមប្រជាជាតិអាស៊ីអាគ្នេយ៍ (អាស៊ាន) ក្នុងទីក្រុង Melbourne សម្រាប់កិច្ចប្រជុំពិសេស បាននិយាយថា ប្រទេសអូស្ត្រាលីចង់ «ធ្វើកិច្ចការបន្ថែមទៀត» ដើម្បី «គាំទ្រដល់កំណើនក្នុងតំបន់ និងដើម្បីសម្រេចបាននូវអត្ថប្រយោជន៍ឲ្យគ្នាទៅវិញទៅមក»។

នៅឯកន្លែងអាហារថ្ងៃត្រង់របស់នាយកប្រតិបត្តិនៃកិច្ចប្រជុំនេះ លោក Albanese បាននិយាយថា៖ «ការធ្វើសកម្មភាពលើបម្រែបម្រួលអាកាសធាតុ គឺជាតម្រូវការបរិស្ថាន សម្រាប់តំបន់របស់យើង។ ហើយនេះក៏ជាឱកាសនៃការផ្លាស់ប្ដូរសេដ្ឋកិច្ចដ៏គួរឲ្យកត់សម្គាល់ផងដែរ»។

ជាមួយគ្នានេះ លោក Albanese បានធ្វើការកត់សម្គាល់ថា ពាណិជ្ជកម្មទ្វេភាគីរបស់អូស្ត្រាលីជាមួយអាស៊ាន មានចំនួនជាង ១៧៨ពាន់លានដុល្លារអូស្រ្តាលី ក្នុងឆ្នាំ២០២២ ពោលគឺជាទំហំធំជាងជាមួយប្រទេសជប៉ុន ឬសហរដ្ឋអាមេរិកទៅទៀត ខណៈដែលការវិនិយោគពីរផ្លូវរវាងប្លុក និងអូស្ត្រាលី មានចំនួន ៣០៧ពាន់លានដុល្លារអូស្ត្រាលី៕