លោកនាយករដ្ឋមន្រ្តី ដូណាល់ ថាស់ ( Donald Tusk) បាននិយាយថា ប្រទេសប៉ូឡូញ នឹងអំពាវនាវឲ្យ គណៈកម្មការអឺរ៉ុប ដាក់បម្រាមទាំងស្រុងលើការនាំចូលផលិតផលម្ហូបអាហារពីប្រទេសរុស្ស៊ី និងបេឡារុស ក្នុងគោលបំណងបង្កើនសន្តិសុខក្នុងតំបន់ និងការពារកសិករ។

លោកថាស់ បានថ្លែងក្នុងអំឡុងសន្និសីទសារព័ត៌មានរួមគ្នាជាមួយសមភាគីលីទុយអានី លោកស្រី Ingrida Simonyte នៅទីក្រុងវីនីញូស (Vilnius) កាលពីថ្ងៃចន្ទថា៖«ខ្ញុំជឿជាក់ថា ការសម្រេចចិត្តរួមគ្នារបស់អឺរ៉ុប នឹងមានប្រសិទ្ធភាពជាងការសម្រេចចិត្តជាលក្ខណៈបុគ្គលរបស់បណ្តាប្រទេសក្នុងតំបន់» ដោយបានបន្ថែមថា លោកនឹងដាក់សេចក្តីសម្រេចមួយជូនសភា។

លោកស្រី Simonyte បានថ្លែងថា ប្រទេសលីទុយអានី នឹងគាំទ្រគំនិតផ្តួចផ្តើមទូទាំងសហភាពអឺរ៉ុប ដើម្បីហាមឃាត់ទំនិញកសិកម្មរបស់រុស្ស៊ី ខណៈដែលនាយករដ្ឋមន្ត្រី បានពិភាក្សាអំពីបញ្ហាសន្តិសុខពាក់ព័ន្ធនឹងការឈ្លានពានរបស់រុស្ស៊ីទៅលើអ៊ុយក្រែន។

លោកថាស់ បានបញ្ជាក់ថា៖«ស្បៀងអាហារ ពិតជាសំខាន់ដូចគ្នានឹងបញ្ហាសន្តិសុខដែរ»។

យោងតាមទិន្នន័យផ្លូវការ ការនាំចូលផលិតផលម្ហូបអាហាររបស់ប្រទេសប៉ូឡូញពីរុស្ស៊ី មានចំនួន ៣៥០លានអឺរ៉ូ ក្នុងឆ្នាំ២០២៣ ដែលទាបជាងការនាំចូលពីអ៊ុយក្រែនចំនួន ១,៧ ពាន់លានអឺរ៉ូ។ ការនាំចូលរបស់រុស្ស៊ី រួមមានភាគច្រើនត្រី រុក្ខជាតិប្រេង និងសារធាតុខ្លាញ់។