ប្រទេសហ្វីលីពីន នៅថ្ងៃអង្គារ (ទី៥ ខែមីនា) បានចោទប្រកាន់ឆ្មាំល្បាតឆ្នេររបស់ចិនថា បាន «បើកបរពត់ពេនយ៉ាងគ្រោះថ្នាក់» ទើបនាំឲ្យមានការបុកគ្នា រវាងនាវាឆ្មាំល្បាតឆ្នេររបស់ខ្លួន និងនាវាចិន អំឡុងពេលបំពេញបេសកកម្មផ្ដល់សម្ភារៈផ្គត់ផ្គង សម្រាប់កងទ័ពហ្វីលីពីន នៅសមុទ្រចិនខាងត្បូង។

វីដេអូដែលចែករំលែកដោយឆ្មាំល្បាតឆ្នេរហ្វីលីពីន (PCG) បានបង្ហាញពីនាវារបស់ខ្លួន BRP Sindangan បានបុកជាមួយនាវាឆ្មាំល្បាតឆ្នេររបស់ចិន ខណៈពេលដែលកំពុងអមដំណើរបេសកកម្មផ្គត់ផ្គង់ជាប្រចាំសម្រាប់កងទ័ពហ្វីលីពីនដែលឈរជើងនៅលើនាវាចម្បាំងចាស់ទ្រុឌទ្រោម ក្នុងតំបន់ថ្មប៉ប្រះទឹក Second Thomas Shoal។ អ្នកនាំពាក្យ PCG បាននិយាយថា នាវាហ្វីលីពីនបានរងការខូចខាតរចនាសម្ព័ន្ធតិចតួចនៅក្នុងឧបទ្ទវហេតុនេះ។

ចំណែកឆ្មាំល្បាតឆ្នេររបស់ប្រទេសចិន បាននិយាយនៅថ្ងៃអង្គារនេះថា ខ្លួនបានចាត់វិធានការគ្រប់គ្រងលើនាវាហ្វីលីពីនដែលបានចូលដោយខុសច្បាប់ទៅក្នុងដែនទឹកជាប់នឹងតំបន់ថ្មប៉ប្រះទឹក Second Thomas Shoal ជាតំបន់ថ្មប៉ប្រះទឹកដែលមានជម្លោះនៅក្នុងសមុទ្រចិនខាងត្បូង។

គួរបញ្ជាក់ថា ទីក្រុងប៉េកាំងអះអាងអធិបតេយ្យភាពភាគច្រើននៃសមុទ្រចិនខាងត្បូង ជាការទាមទារដែលកាត់ចូលទៅក្នុងតំបន់សេដ្ឋកិច្ចផ្តាច់មុខ (EEZ) របស់វៀតណាម ហ្វីលីពីន ម៉ាឡេស៊ី ប្រ៊ុយណេ និងឥណ្ឌូនេស៊ី។ តុលាការអាជ្ញាកណ្តាលអចិន្ត្រៃយ៍ ក្នុងឆ្នាំ២០១៦ បានរកឃើញថា ការទាមទាររបស់ប្រទេសចិនមិនមានមូលដ្ឋានផ្លូវច្បាប់នោះទេ៕