ទីភ្នាក់ងារព័ត៌មានរដ្ឋ Anadolu បាននិយាយនៅថ្ងៃអង្គារនេះថា នគរបាលទួរគី បានឃុំខ្លួនមនុស្សចំនួន៧ នាក់ រួមទាំងអ្នកស៊ើបអង្កេតឯកជនម្នាក់ ដែលត្រូវបានសង្ស័យថា បានលក់ព័ត៌មានទៅឲ្យសេវាចារកម្ម Mossad របស់អ៊ីស្រាអែល។

សារព័ត៌មានAnadolu បានដកស្រង់ប្រភពសន្តិសុខ ដោយនិយាយថា អ្នកស៊ើបអង្កេតឯកជនដែលជាអតីតអ្នកបម្រើការសាធារណៈ ត្រូវបានគេសង្ស័យថា បានប្រមូលព័ត៌មានអំពីក្រុមហ៊ុន និងបុគ្គលមួយចំនួននៅមជ្ឈិមបូព៌ា នៅក្នុងប្រទេសទួរគី ដោយដាក់ឧបករណ៍តាមដាន និងចូលរួមក្នុងការឃ្លាំមើល។

ប្រភពបាននិយាយថា ការឃុំខ្លួននេះ គឺជាផ្នែកមួយនៃប្រតិបត្តិការដែលធ្វើឡើងដោយទីភ្នាក់ងារចារកម្ម ជាតិរបស់ទួរគី MIT និងនគរបាលប្រឆាំងភេរវកម្មក្រុងអ៊ីស្តង់ប៊ុល។

ទីក្រុងអង់ការ៉ា មិនបានធ្វើសេចក្តីថ្លែងការណ៍ជាផ្លូវការអំពីប្រតិបត្តិការនេះទេ។ អ៊ីស្រាអែល មិនបានធ្វើអត្ថាធិប្បាយភ្លាមៗលើរបាយការណ៍របស់សារព័ត៌មានAnadoluទេ។

ប្រភពបានឲ្យដឹងទៀតថា អ្នកស៊ើបអង្កេតទួរគី ត្រូវបានបណ្តុះបណ្តាលដោយសេវាចារកម្ម Mossad នៅក្នុងរដ្ឋធានីបែលហ្គ្រាដ ( Belgrade) របស់ប្រទេសស៊ែរប៊ី ហើយបានទទួលការទូទាត់ជារូបិយប័ណ្ណគ្រីបតូ ដែលមិនបានបង្ហាញខ្លួន នៅក្នុងកំណត់ត្រាផ្លូវការ។