តុលាការជាន់ខ្ពស់ម៉ាឡេស៊ី កាលពីថ្ងៃចន្ទ (ទី៤ ខែមីនា) បានច្រានចោលសំណើសុំឲ្យមានការពិនិត្យឡើងវិញរបស់តុលាការ ពីសំណាក់អតីតរដ្ឋមន្ត្រីហិរញ្ញវត្ថុ លោក Daim Zainuddin និងក្រុមគ្រួសាររបស់លោក ជុំវិញការស៊ើបអង្កេតរបស់គណៈកម្មការប្រឆាំងអំពើពុករលួយម៉ាឡេស៊ី (MACC) លើពួកគេ។

ចៅក្រមលោក Wan Ahmad Farid Wan Salleh បានធ្វើសេចក្តីសម្រេចដោយគ្មានការចេញដីកាបង្គាប់ចំណាយ អំឡុងដំណើរការនីតិវិធីតុលាការបើកចំហ។ ចៅក្រមបាននិយាយថា៖ «សំណើរបស់អ្នកទាំងនោះ មិនទទួលបានជោគជ័យនោះទេ ក្នុងការបង្កើតបាននូវលក្ខខណ្ឌទុច្ចរិត ដើម្បីជំទាស់នឹងមន្ត្រី MACC ដែលបានអនុវត្តការស៊ើបអង្កេតនោះ»។

លោក Daim វ័យ ៨៥ឆ្នាំ និងភរិយារបស់លោក លោកស្រី Toh Puan Nai'mah Abdul Khalid វ័យ ៦៦ឆ្នាំ និងកូនប្រុស-ស្រីចំនួន ៤នាក់របស់អ្នកទាំង២ ដែលមានឈ្មោះ Asnida វ័យ ៦២ឆ្នាំ Md Wira Dani វ័យ ៤៥ឆ្នាំ Muhammad Amir Zainuddin វ័យ ២៨ឆ្នាំ និង Muhammad Amin Zainuddin វ័យ ២៥ឆ្នាំ រួមជាមួយក្រុមហ៊ុនអាគារ Ilham Tower Sdn Bhd គឺជាអ្នកដាក់ពាក្យស្នើសុំនេះ ដោយបានដាក់ពាក្យស្នើនេះ នៅមុនថ្ងៃទី១០ ខែមករា៕