ប្រភពពីប៉ាឡេស្ទីន បាននិយាយកាលពីថ្ងៃចន្ទថា កងកម្លាំងអ៊ីស្រាអែល បានវាយឆ្មក់ចូលទីក្រុងរ៉ាម៉ាឡា(Ramallah) របស់រដ្ឋបាលប៉ាឡេស្ទីន នៅតំបន់វេសបែង នៅពេលយប់ ដោយបានសម្លាប់ក្មេងប្រុសអាយុ ១៦ឆ្នាំនៅក្នុងជំរំជនភៀសខ្លួន ក្នុងអំឡុងពេលប្រតិបត្តិការដ៏ធំបំផុតរបស់ពួកគេចូលទៅក្នុងទីក្រុងនេះ ក្នុងរយៈពេលជាច្រើនឆ្នាំ។

យោធាអ៊ីស្រាអែល បាននិយាយថា កងកម្លាំងសន្តិសុខ បានធ្វើប្រតិបត្តិការប្រឆាំងអំពើភេរវកម្ម នៅក្នុងជំរំ អំឡុងពេលដែលកុបកម្ម បានផ្ទុះឡើង ដោយមានដុំថ្ម និងគ្រាប់បែកសាំងបានគប់ទៅលើទាហាន ដែលឆ្លើយតបដោយការបាញ់គ្រាប់ពិត។

ទីភ្នាក់ងារព័ត៌មានប៉ាឡេស្ទីន WAFA បានរាយការណ៍ថា នៅក្នុងការវាយឆ្មក់ដាច់ដោយឡែកមួយទៀតនៅតំបន់វេសបែង កងកម្លាំងអ៊ីស្រាអែល បានសម្លាប់ក្មេងប្រុសអាយុ ១០ឆ្នាំម្នាក់ និងនៅក្នុងភូមិ Burin ភាគខាងត្បូងទីក្រុងណាប្លុស (Nablus)។ ដោយបានដកស្រង់ប្រភពវេជ្ជសាស្រ្ដ សារព័ត៌មាននេះបានឲ្យដឹងទៀតថា ក្មេងប្រុសនោះ ត្រូវបានទាហានអ៊ីស្រាអែលបាញ់ចំក្បាល។

យោធាអ៊ីស្រាអែល មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

អំពើហិង្សា បានរីករាលដាលពាសពេញតំបន់វេសបែងស្របទៅនឹងសង្រ្គាមហ្កាហ្សា ដោយមានជនជាតិប៉ាឡេស្ទីនយ៉ាងតិច ៤០០ នាក់ ត្រូវបានសម្លាប់នៅក្នុងការប៉ះទង្គិចជាមួយទាហាន និងអ្នកតាំងលំនៅរបស់អ៊ីស្រាអែល ហើយអ៊ីស្រាអែលតែងតែវាយឆ្មក់តំបន់ប៉ាឡេស្ទីនឆ្លងកាត់ទឹកដីដែលខ្លួនកាន់កាប់ ក្នុងឆ្នាំ១៩៦៧។