យោងតាមព័ត៎មានបច្ចុប្បន្នភាព ខណៈជម្លោះរុស្ស៊ី-អ៊ុយក្រែន បានអូសបន្លាយអស់រយ:ពេល២ឆ្នាំមកនេះ រុស្ស៊ីបាននិយាយកាលពីថ្ងៃច័ន្ទថា កងទ័ពរបស់ខ្លួនបានវាយប្រហារចំយានប្រយុទ្ធរបស់អ៊ុយក្រែន ផលិតដោយអាមេរិក ខណៈអ៊ុយក្រែននិយាយថា ខ្លួនបានវាយប្រហាររុស្ស៊ីលើសមរភូមិជាច្រើន ។

ក្រសួងការពារជាតិរុស្ស៊ី បាននិយាយនៅក្នុងរបាយការណ៍សង្រ្គាមថា កងទ័ពរុស្ស៊ីបានបន្ដការវាយប្រហារកងទ័ពសកម្មរបស់អ៊ុយក្រែននិងគ្រឿងយុទ្ធោបករណ៍នៅមុខព្រួញផ្សេងៗ ក្នុងនោះរួមមាន គូពីយ៉ាំង ដូនេត ឃើសិន និងអាឌីវអ៊ីវកា។

រុស្ស៊ីនិយាយថា ខ្លួនបានកម្ទេចរថក្រោះពីរគ្រឿងក្នុងនោះមាន១គ្រឿងគឺអាប្រាម(Abrams) ដែលផ្ដល់ដោយសហរដ្ឋអាមេរិកទៅអោយកងទ័ពអ៊ុយក្រែន យានប្រយុទ្ធថ្មើរជើង៤គ្រឿង ក្នុងនោះមាន ប្រភេទប្រេតលី (Bradley)ជាយានប្រយុទ្ធថ្មើរជើង៣គ្រឿងផលិតដោយអាមេរិក រថពាសដែក កាំភ្លើងផ្លោង និងប្រព័ន្ធរ៉ូកែតហ៊ីម៉ាស(HIMARS)ផងដែរ។

នៅថ្ងៃជាមួយគ្នានេះ នាយអគ្គសេនាធិការកងទ័ពអ៊ុយក្រែន បាននិយាយថា មានការជាប់ទងនឹងការប្រយុទ្ធ ៦៣លើកដែលបានចាប់ផ្ដើមនៅក្នុងរយៈពេល២៤ម៉ោងកន្លងទៅនេះ ដោយកងទ័អាកាសអ៊ុយក្រែន បានវាយប្រហារទៅលើបុគ្គលិកយោធារុស្ស៊ី និងតំបន់ប្រមូលផ្ដុំយុទ្ធោបករណ៍ ក៏ដូចជា ស្ថានីយត្រួតពិនិត្យយានដ្រូនឬUAVផងដែរ។

ភាគីអ៊ុយក្រែននិយាយថា កងទ័ពអាកាសរបស់ខ្លួន បានបំផ្លាញមីស៊ីលប្រភេទKH-59របស់រុស្ស៊ី១ដើម ខណ:ដែលរ៉ូកែត និងទ័ពកាំភ្លើងធំរបស់ខ្លួន បានវាយប្រហារលើតំបន់ប្រមូលផ្ដុំបុគ្គលិកយោធា និងប្រព័ន្ធការពារដែនអាកាសរបស់រុស្ស៊ី៕