បាល់ទាត់៖ ការប្រកួតសប្ដាហ៍ទី៧ នៃពានរង្វាន់មិត្តហ្វូនខេមបូឌានលីគចំនួន ២ប្រកួតដែលត្រូវប្រកួតកាលពីថ្ងៃទី១១ ខែកក្កដាម្សិលមិញ សុទ្ធតែត្រូវបានពន្យារពេលដោយបញ្ហាកូវីដ-១៩ ក្នុងនោះក្រុមភ្នំពេញក្រោនជួបក្រុមម្ចាស់ផ្ទះនគរបាលជាតិ (ប៉ូលិស) នៅកីឡដ្ឋាន 7NG ត្រូវលើកការប្រកួតដោយមិនទាន់កំណត់កាលបរិច្ឆេទថ្មី ខណៈក្រុមកំពូលតារាងអង្គរថាយហ្គឺរជួបក្រុមអគ្គិសនីកម្ពុជា ត្រូវបានពន្យារពេលមកប្រកួតថ្ងៃនេះវិញ។
ចំពោះការប្រកួតរវាងភ្នំពេញក្រោន និងនគរបាលជាតិត្រូវបានលើកពេល បន្ទាប់ពីរកឃើញករណីវិជ្ជមានកូវីដ-១៩ លើកីឡាករម្នាក់របស់នគរបាលជាតិ។ តាមការបញ្ជាក់របស់គណៈកម្មការប្រកួតបាល់ទាត់ជាតិកម្ពុជា ដោយសិក្សាអំពីទំហំ និងបង្ការករណីហានិភ័យអាចបន្តទៅក្លិបដ៏ទៃ ដូច្នេះនៅថ្ងៃទី១១ ខែកក្កដាម្សិលមិញ មន្ដ្រី និងកីឡាករដទៃទៀតទាំងអស់ក្នុងក្រុម ត្រូវបានយកសំណាកធ្វើតេស្ដដោយប្រភេទ PCR Test។ ប៉ុន្ដែលទ្ធផលនឹងបានដឹងនៅ ២ ឬ ៣ថ្ងៃបន្ទាប់ ហើយក្រុមត្រូវធ្វើចត្ដាឡីស័កតាមវិធានសុខាភិបាល។ អាស្រ័យហេតុនេះគណៈកម្មការប្រកួតបាល់ទាត់ជាតិកម្ពុជា ក៏សម្រេចផ្អាកការប្រកួតរវាងក្រុមនគរបាលជាតិ និងក្រុមភ្នំពេញក្រោនដែលគ្រោងជួបគ្នានៅល្ងាចថ្ងៃទី១១ ខែកក្កដាជាបណ្ដោះអាសន្ន ខណៈកាលបរិច្ឆេទថ្មីនឹងប្រកាសនាពេលក្រោយ។
ដោយឡែកការប្រកួតរវាងក្រុមអគ្គិសនីកម្ពុជា និងអគ្គិសនីកម្ពុជាវិញត្រូវបានរំកិល ១ថ្ងៃមកប្រកួតនៅថ្ងៃទី១២ ខែកក្កដា ឆ្នាំ២០២១ នេះវិញ។ ចំពោះមូលហេតុនៃការពន្យារពេលការប្រកួតត្រឹមតែ ១ថ្ងៃនេះដោយសារការធ្វើតេស្ដលើកទី១ កាលពីថ្ងៃទី០៩-កក្កដា ក្លិបអគ្គិសនីកម្ពុជាបានរកឃើញកីឡាករម្នាក់មានវិជ្ជមាន ដូច្នេះមន្ដ្រី និងកីឡាករដទៃដែលអវិជ្ជមានត្រូវរង់ចាំលទ្ធផលធ្វើតេស្ដលើកទី២ ក្រោយ ៤៨ ឬ ៧២ម៉ោង។ ប៉ុន្ដែដោយលទ្ធផលតេស្ដលើកទី២ នៅថ្ងៃទី១១ ខែកក្កដានេះគឺអវិជ្ជមានទាំងអស់ CNCC ក៏សម្រេចរៀបចំការប្រកួតរវាងក្រុមទាំងពីរនៅថ្ងៃទី១២ ខែកក្កដានេះតែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
