សមាគមទន្តពេទ្យកម្ពុជាបានរៀបចំសន្និសីទ និងពិព័រណ៍ទន្តសាស្ត្រប្រចាំឆ្នាំលើកទី២២ ក្រោម​ប្រធាន​បទ «ការអភិវាឌ្ឍន៍ឥតឈប់ឈរ នៃវិស័យទន្តសាស្ត្រជាសកល» ដែលប្រព្រឹត្ត​ទៅ​ក្រោម​វត្ត​មាន​របស់​ឯកឧត្តម ស៊ិក បុណ្ណា រដ្ឋលេខាធិការក្រសួងសុខាភិបាល ដែល​មាន​ការ​ចូលរួម​ពី​វាគ្មិន​ល្បីៗទាំ​ងជាតិ និងអន្តរជាតិចំនួន១៤រូប និងសិក្ខាកាមសរុបចំនួនជិត ១ពាន់នាក់ ព្រមទាំង​មាន​ស្តង់ដាក់តាំងបង្ហាញចំនួន ៩២ស្តង់។

ទន្តបណ្ឌិត ស៊ឹង គីមសាន ប្រធានក្រុមប្រឹក្សាភិបាលសមាគមទន្តពេទ្យកម្ពុជា នៅក្នុងកម្មវិធីនេះ បាន​មាន​ប្រសាសន៍ថា បច្ចុប្បន្នសម្រាប់វិស័យទន្ដពេទ្យនៅកម្ពុជាមានការរីកចម្រើនគួរឲ្យសម្គាល់ ហើយ​ដើម្បីឲ្យវិស័យនេះកាន់តែដើរទាន់ វិស័យទន្ដសាស្រ្ដលើពិភពលោក សមាគម​តែងតែ​ធ្វើ​ការ​រៀប​ចំ​ពិព័រណ៍ទន្ដសាស្រ្ដនេះឡើងជារៀងរាល់ឆ្នាំ ក្នុងគោលបំណងជំរុញឲ្យទន្ដពេទ្យ និង​និស្សិត​ទន្ដសាស្រ្ដ​ទាំង​ជំនាន់មុន និងក្រោយទាំងអស់មកបណ្ដុះបណ្ដាលបន្ថែមទៀត។

លោកបានបន្តថា ការវិវត្តនៃវិស័យទន្ដសាស្រ្ដនៅកម្ពុជាសព្វថ្ងៃនេះ បានកំពុង​វិវត្តន៍​ខ្លួន​កាន់​តែ​រីកច​ម្រើនច្រើ​ន និង​ខ្លាំងក្លាបំផុត បើធៀបនឹងរយៈពេលប៉ុន្មានចុងក្រោយនេះ ជាក់ស្តែង កាល​ពី​ចាប់​ផ្តើម​លើកដំបូង ក្រុមហ៊ុនដែលចូលរួម​តាំង​បង្ហាញ​តាម​ស្តង់​មាន​ចំនួន​ប្រមាណ​២០​ទៅ​៣០​ប៉ុណ្ណោះ ប៉ុន្តែមកដល់បច្ចុប្បន្ននេះ មានរហូតជាង ៩០ស្តង់។

ក្នុងពិធីនាឱកាសនោះឯកឧត្តមរដ្ឋលេខាធិការក្រសួងសុខាភិបាល បានអំពាវនាវដល់ទន្តបណ្ឌិត និង​ទន្តពេទ្យទាំងអស់ ត្រូវគោរពស្រឡាញ់ និងយកចិត្តទុកដាក់ចំពោះអ្នកជំងឺគ្រប់ប្រភេទ គឺ​កុំរើស​អើងថា អ្នកមាន ឬអ្នកក្រ និងត្រូវ​គិតថា​ការ​ឈឺចាប់រ​បស់​អ្នក​ជំងឺ​គឺជា​កា​រ​ឈឺចា​ប់​របស់​យើង​ដែរ។

ឯកឧត្តម បានលើកឡើងថា ដើម្បីធ្វើឲ្យប្រសើរឡើងថែមទៀតនូវវិស័យសុខាភិបាល ក៏​ដូច​ជា​បង្កើន​​គុណភាព និងសមត្ថភាព ចាំបាច់ណាស់ដែលទន្តបណ្ឌិត ទន្តពេទ្យទាំង​អស់​ត្រូវ​ខិតខំ​ប្រឹង​ប្រែង​សិក្សា​ជាបន្តបន្ទាប់នូវបច្ចេកវិទ្យាថ្មីៗពីបណ្តារៀមច្បង ដែលមានបទពិសោធន៍​ច្រើន​ព្រម​ទាំង​សហការ​ជាមួយទន្តបណ្ឌិតអន្តរជាតិ ដើម្បីបង្កើននូវសមត្ថភាព​ខ្ពស់​កាន់​តែ​សុក្រិត្យ​ថែម​ទៀត​៕ អត្ថបទ៖ ឈិត បូរ៉ាវី