មន្ត្រីជំនាញបានចាប់ផ្ដើមដំណើរការកំណែលើក្រដាសកិច្ចការ បេក្ខជនប្រឡង​ចូល​មន្ត្រី​អង្គភាព​ប្រឆាំង​អំពើ​ពុករលួយ ក្រសួងសាធារណការ និងដឹកជញ្ជូន និងក្រសួងកសិកម្ម រុក្ខប្រមាញ់ និង​នេសាទ។​

ដំណើរការកំណែនេះចាប់ផ្ដើមក្រោមវត្តមាន ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រី​ក្រសួង​មុខងារ​សាធារណៈ វត្តមាន ឯកឧត្តម ទេសរដ្ឋមន្ត្រី ឱម យិនទៀង ប្រធាន​អង្គភាព​ប្រឆាំង​អំពើ​ពុក​រលួយ រួមទាំងតំណាងក្រសួងសាធារណការ និងដឹកជញ្ជូន តំណាងមកពីក្រសួងកសិកម្ម រុក្ខ​ប្រមាញ់ និងនេសាទ និងវត្តមានអ្នកសង្កេតការណ៍ផងដែរ។

ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ រួមទាំង​វត្តមាន​ឯកឧត្តម ទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយ នៅថ្ងៃទី ៦ ខែមីនា ឆ្នាំ២០២៤នេះ បានចូលរួមធ្វើជាសាក្សី និង​ពិនិត្យ​មើល​ការ​ចាប់​ផ្ដើម​ដំណើរ​ការ​កំណែ​ក្រដាស​កិច្ច​ការ​បេក្ខជនប្រឡងចូលជាមន្ត្រីដោយផ្ទាល់។ ការបើកដំណើរការកំណែនេះ គឺកែ​ទៅ​លើ​ក្រដាស​កិច្ច​ការ​ប្រឡង​ទាំង ៣ថ្ងៃ រួមមានការប្រឡងចូលអង្គភាពប្រឆាំងអំពើពុករលួយ ការប្រឡង​ចូល​ក្រសួង​សាធារណការ និងដឹកជញ្ជូន និងការប្រឡងចូលក្រសួងកសិកម្ម រុក្ខប្រមាញ់ និងនេសាទ។

ក្នុងការចាប់ផ្ដើមដំណើរការកំណែនេះ ឯកឧត្តម ង៉ឺយ ធឿន នាយករងសាលាភូមិន្ទរដ្ឋបាល និង​ជា​អនុ​ប្រធានអនុគណៈកម្មការកំណែវិញ្ញាសា លើកឡើងថាការកែបែងចែកជា ៣បន្ទប់ផ្សេងគ្នា និង​មានវត្តមានសាស្ត្រាចារ្យជំនាញកែទៅលើក្រដាសកិច្ចនីមួយៗ ក្រោយ​កាត់​ក្បាល​សន្លឹក​កិច្ច​ការ​រួចរាល់​។

ការកែនេះ ក៏ធ្វើឡើងក្រោមការចូលរួមសង្កេតការណ៍ ពីមន្ត្រីអង្គភាពប្រឆាំងអំពើពុករលួយ និងវត្ត​មាន​របស់អ្នកសង្កេតការណ៍ផងដែរ។ ការចូលរួមសង្កេតការណ៍នេះ គឺរហូតដល់​ដំណាក់​កាល​បូក​ស្រង់​ពិន្ទុ ដើម្បីរក្សាភាពត្រឹមត្រូវបំផុតសម្រាប់បេក្ខន។ ឯកឧត្តមលើកឡើងដែរថា គ្រប់បុគ្គល ជា​មន្ត្រី ឬអ្នកមានអំណាច ដែលគ្មានភារកិច្ចគ្មានសិទ្ធិចូលក្នុងបន្ទប់កំណែជាដាច់ខាត។

ពាក់ព័ន្ធនឹងកែក្រដាសកិច្ចការនេះ គឺមានភាពចាំបាច់បំផុត ដែល​តម្រូវ​ឱ្យ​មាន​ការ​កាត់​ក្បាល​វិញ្ញាសា និងដាក់លេខសម្ងាត់ មុននឹងចាប់ផ្ដើមការកែ។ នេះជាការបញ្ជាក់ថែមរបស់ឯកឧត្តម ខៀវ ច័ន្ទប៊ុនធឿន ជាប្រធានអនុគណៈកម្មការចុះលេខសម្ងាត់ កាត់ក្បាលសន្លឹកកិច្ចការប្រឡង និង​ស្រង់ពិន្ទុ។ ឯកឧត្តមថា ការធ្វើបែបនេះ គឺដើម្បីកុំឱ្យអ្នកកែស្គាល់ពីអត្តសញ្ញាណ របស់​សន្លឹក​កិច្ចការ​នីមួយៗ។

គួរបញ្ជាក់ឱ្យដឹងថា ការកែលើក្រដាសកិច្ចការសម្រាប់ការប្រឡងជាមន្ត្រីទាំង ៣ក្រសួងស្ថាប័ននេះ តាម​ការ​គ្រោង​មានរយៈពេល ១សប្ដាហ៍។ ជាទូទៅក្រសួងមុខងារសាធារណៈ ក៏ផ្ដល់​ឱកាស​សម្រាប់​បេក្ខជនតវ៉ា ក្រោយប្រកាសលទ្ធផលផងដែរ៕ អត្ថបទ៖ គឹម ហុក