​បាល់ទាត់៖ ទីបំផុត Lionel Messi បានបញ្ចប់​ការទន្ទឹងរង់ចាំ​ឈ្នះ​ពាន​លើកដំបូង​ ជាមួយ​ក្រុម​ជំរើសជាតិ​អា​ហ្ស​ង់​ទីនក្រោយ​យកឈ្នះ​ម្ចាស់ផ្ទះ​ប្រេ​ស៊ី​ល​ លើក​ពាន​បាល់ទាត់​ជើងឯក​ទ្វីប​អា​មេ​រក​ខាងត្បូង Copa America​។

​​កីឡាករ​វ័យ ៣៤ឆ្នាំ​រូបនេះ​បាន​លុតជង្គង់​នឹង​វាលស្មៅ​ នៅពេល​លឺស្នូរ​កញ្ចែ​អាជ្ញាកណ្តាល​ផ្លុំ​បញ្ចប់​ការប្រកួត អប​ជាមួយ​ភាពសប្បាយ​រីករាយ​លាយ​ទឹកភ្នែក​។​ ​នេះ​ជា​ពាន​ជើងឯក​ទ្វីបអា​មេរិក​ខាងត្បូង​សំរាប់​អា​ហ្ស​ង់​ទីន​ក្នុង​រយៈពេល ២៨ឆ្នាំ និង​ជា​ពាន​ដំបូង​របស់ Messi ជា​មួយ​​ក្រុម​ជម្រើសជាតិ​អា​ហ្ស​ង់​ទីន​ផងដែរ ខណៈ​ខ្សែប្រយុទ្ធ​ដែល​ផុត​កុងត្រា​ជាមួយ Barcelona រូបនេះ​គឺជា​កីឡាករ​ឆ្នើម​ប្រចាំ​ព្រឹត្តិការណ៍ Copa America ឆ្នាំនេះ​ក្រោយ​រកបាន ៤គ្រាប់​។ ​Angel Di Maria គឺជា​អ្នក​ស៊ុត​សំរេច​គ្រាប់​បាល់​ជ័យជំនះ​ ឱ្យ​អា​ហ្ស​ង់​ទីន​យកឈ្នះ​ប្រេ​ស៊ី​ល ខណៈ​អ្នកចាំទី​អា​ហ្ស​ង់​ទីន Emi Martinez ជួយសង្គ្រោះ​បាល់​សំខាន់ៗ​ជាច្រើន​ពី​ការ​គ្រប​សង្កត់​របស់​ប្រេ​ស៊ី​ល​។ ​​ផ្ទុយ​ពី Messi អតីត​រួម​ក្រុម​នៅ Barcelona, Neymar បាន​ទ្រហោយំ​ ខណៈ​អ្នក​ទាំងពីរ​ឱប​គ្នា​យ៉ាងយូរ​ក្រោយ​ចប់​ការប្រកួត​ជាមួយនឹង​ការអបអរ និង​លើកទឹកចិត្ត​ទៅវិញទៅមក​។

​​ការប្រកួត​នេះ​មាន​ទស្សនិកជន​ចូលរួម​ទស្សនា ៧ពាន់​នាក់​ប៉ុណ្ណោះ​នៅ​កីឡដ្ឋាន Maracana ដោយសារតែ​វិបត្តិ Covid-19 ខណៈ​អ្នកគាំទ្រ​ទាំង ៧ពាន់​នាក់​នោះ​សុទ្ធតែ​ត្រូវបាន​អញ្ជើញ​ឱ្យចូល​រួម​។​ ​​មក​មើល​ស្ថិតិ​របស់ Messi នៅ Copa America តាំងពី​ឆ្នាំ២០០៧ មកដល់​ព្រឹត្តិការ​ណ៍​​ចុងក្រោយ​នេះ​គេ​រកបាន​សរុប ១៣គ្រាប់​ដោយ​ក្នុងនោះ​ឆ្នាំ២០០៧ ជា​ជើងឯក​រង, ឆ្នាំ២០១១ បាន​ត្រឹម​វគ្គ ៨ក្រុម, ឆ្នាំ២០១៥ ជើងឯក​រង, ឆ្នាំ២០១៦ ជើងឯក​រង, ឆ្នាំ២០១៩ វគ្គ​ពាក់កណ្តាល​ផ្តាច់ព្រ័ត្រ និង​ឆ្នាំ២០២១ នេះ​ជា​ជើងឯក​។ ​ជើងឯក Copa America លើក​នេះ​ ធ្វើឱ្យ​អា​ហ្ស​ង់​ទីន​តាម​ទាន់​អ៊ុយ​រូ​ហ្កា​យ​ដែល​ឈ្នះ​ជើងឯក Copa America ១៥ដង​ដូចគ្នា ខណៈ​ប្រេ​ស៊ី​ល​ឈ្នះ​សរុប​ត្រឹម ៩ដង​៕

​អត្ថបទ​៖​នាង សុភា​វុ​ធ