កំពង់ឆ្នាំង៖ ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង នារសៀល​ថ្ងៃទី​០៥ ខែមីនា ឆ្នាំ២០២៤នេះ បានស្នើអោយមន្ត្រីនគរបាលយុត្តិធម៌នៅក្នុងខេត្តកំពង់ឆ្នាំងទាំងអស់ ត្រូវ​​នាំ​គ្នាគោរពច្បាប់អោយបានត្រឹមត្រូវ មិនត្រូវ​គោរព​តែ​បុគ្គល​ចោល​ច្បាប់​នាំទុក្ខ​ដ​ល់​រាស្ត្រ​នោះ​ឡើយ​។ ឯកឧត្តមបានថ្លែងបែបនេះ ក្នុងពេលឯកឧត្តម អ៊ឹម សុផាន អកញកព្រះរាជអាជ្ញារង និង​ក្រុម​ការងារ នៃមហាអយ្យការអមសាលាឧទ្ទរណ៍ភ្នំពេញ ចុះធ្វើអធិការកិច្ច​នៅ​អយ្យការ​អម​សាលា​ដំបូង​ខេត្ត ពន្ធនាគារ និងមន្ត្រីនគរបាលយុត្តិធម៌ក្នុងខេត្តកំពង់ឆ្នាំង។

ឯកឧត្តម ឯក ស៊ុនរស្មី បានបន្តថា រយៈពេល១ឆ្នាំកន្លងមកនេះ ការ​ធ្វើការងារ​ជាមួយ​នគរបាល​យុត្តិធម៌​ ក្នុងខេត្តកំពង់ឆ្នាំង គឺមាន​នគរបាល​យុត្តិធម៌​មួយ​ចំនួន​មិនទាន់​អនុវត្ត​បាន​ត្រឹម​ត្រូវ​តាម​មាត្រា​៨៩ នៅក្នុងក្រមនីតិវិធីនៅឡើយ ហើយមាត្រា៨៩នោះ ឯកឧត្តមបានប្រជុំ​ជាមួយ​នគរបាល​យុត្តិធម៌​ដោយនិយាយជាច្រើនលើករួចមកហើយ តែមកដល់ពេលនេះ​នគរបាល​យុត្តិធម៌​មិន​អនុវត្តបានត្រឹមត្រូវនៅឡើយ ។ ក្នុងច្បាប់ នៅពេលចាប់បានបទល្មើស ឬ​មាន​ហេតុការណ៍​អ្វី​កើត​ឡើង នគរបាលយុត្តិធម៌ ត្រូវរាយការណ៍ជាបន្ទាន់មកព្រះរាជអាជ្ញា។ មក​ដល់​ពេល​នេះ សំណុំរឿងមិនប្រក្រតីក្នុងខេត្តមានចំនួន១៥ករណីហើយមានភាពយឺតយ៉ាវ។ ដូចនេះ ក្នុងនាមឯកឧត្តមជាព្រះរាជអាជ្ញាអមសាលាដំបូងខេត្ត ស្នើ​សុំអោយ​មន្ត្រី​នគរបាល​យុត្តិធម៌​ទាំងអស់​ក្នុង​ខេត្តកំពង់ឆ្នាំង មេត្តានាំគ្នាគោរពច្បាប់ កុំនាំគ្នាគោរពតែបុគ្គល។់

ឯកឧត្តម អ៊ឹម សុផាន អគ្គព្រះរាជអាជ្ញារង នៃ​មហា​អយ្យការ​អម​សាលា​ឧទ្ទរណ៍​ភ្នំពេញ​បាន​មាន​ប្រសាសន៍​ថា ឯកឧត្តមចុះមកធ្វើអធិការកិច្ចក្នុងខេត្តកំពង់ឆ្នាំងនាពេលនេះ គឺធ្វើអធិការ​កិច្ច​លើ​ភាព​យឺតយ៉ាវ នៃ​សំណុំរឿង បញ្ហានីតិវិធី(បច្ចេកទេសអនុវត្ត សំណួរ ចម្លើយ) ការពិនិត្យ​សំណុំ​រឿង ការពិនិត្យសៀវភៅ បញ្ហាប្រឈម និងដំណោះស្រាយ។ ក្រុម​ការងារ​បាន​អធិការកិច្ច​ទៅ​លើ​ពន្ធនាគារ​ខេត្តកំពង់ឆ្នាំង ដោយពិនិត្យលើសាលក្រម សាលដីការ ការឃុំខ្លួនលើស អ្នក​ទោស​អនីតិជន អ្នកទោសជាស្ត្រីមានកូននៅជាមួយ អ្នកទោសរោគចិត្ត ពិនិត្យសៀវភៅ និង​ស្ថាន​ភាព​អ្នក​ទោស​។ ក្រុមការងារក៏បានដំណើរការអធិការកិច្ចនៅបញ្ជាការកងរាជអាវុធហត្ថខេត្ត លើ​បញ្ហា​ប្រឈម​ និងដំណោះស្រាយ ពិនិត្យសៀវភៅ និងពិនិត្យកន្លែងឃាត់ខ្លួន។

ឯកឧត្តម បានសុំ​ឲ្យមន្ត្រី​នគរបាល​យុត្តិធម៌​ទាំងអស់​ដែល​មិន​អស់​ចិត្ត​ពី​របប​រាយការណ៍​ជូន​ព្រះ​រាជ​អាជ្ញា អាចសួរអគ្គព្រះរាជអាជ្ញាបាន ថាតើព្រះរាជអាជ្ញា​អោយ​រាយការណ៍​យោង​តាម​មាត្រា​លេខ​៨៩​នោះ ត្រឹមត្រូវឬអត់ និងមាត្រាមាត្រាផ្សេងទៀតនៅក្នុងក្រមនីតិវិធីព្រហ្មទណ្ណនោះ ៕ កាំង ហុងវាស្នា