ភ្នំពេញ ៖ អគ្គលេខាធិការនៃ គ.ល.ក. បើកកិច្ចពិភាក្សា និងផ្លាស់ប្ដូរមតិយោបល់ជាមួយអាជ្ញាធរមានសមត្ថកិច្ចពាក់ព័ន្ធ ខេត្តបាត់ដំបង ដើម្បីលើកកម្ពស់ការយល់ដឹងឱ្យកាន់តែទូលំទូលាយ លើការគ្រប់គ្រងអាជីវកម្មល្បែងផ្សងសំណាង ការដោះស្រាយនូវបញ្ហាប្រឈម និងផលប៉ះពាល់ពីល្បែងស៊ីសងខុសច្បាប់គ្រប់ប្រភេទ។

​ឯកឧត្តម រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្មកម្ពុជា គ.ល.ក. នៅថ្ងៃទី ៥ ខែ មីនា ឆ្នាំ២០២៤ នេះ បានអញ្ជើញជាអធិបតីភាព ក្នុងកិច្ចប្រជុំពិភាក្សាស្តីពី ការគ្រប់គ្រងល្បែងផ្សងសំណាង និងការគ្រប់គ្រងផលប៉ះ ពាល់ពីល្បែងស៊ីសងខុសច្បាប់គ្រប់ប្រភេទ នៅខេត្តបាត់ដំបង ដោយក្នុងកិច្ចប្រជុំនេះ មានគោលបំណងពិភាក្សា ពិគ្រោះ និងផ្លាស់ប្ដូរ មតិយោបល់រវាង អគ្គលេខាធិការដ្ឋាននៃ គ.ល.ក. និងអាជ្ញាធរមានសមត្ថកិច្ចពាក់ព័ន្ធនៅខេត្តបាត់ដំបង លើការគ្រប់គ្រងអាជីវកម្ម ល្បែងផ្សងសំណាង នៅក្នុងព្រះរាជាណាចក្រកម្ពុជា ដើម្បីកំណត់ និងដោះស្រាយនូវបញ្ហាប្រឈម និងផលប៉ះពាល់ពីល្បែងស៊ីសង ខុសច្បាប់គ្រប់ប្រភេទ ដែលកំពុងកើតមានឡើងនៅក្នុងកិច្ចដំណើរការអាជីវកម្មល្បែងផ្សងសំណាង។

ក្រៅពីនេះ គណៈកម្មការគ្រប់គ្រងល្បែងពាណិជ្ជកម្មកម្ពុជា និងបង្កើនកិច្ចសហការយ៉ាងជិតស្និទ្ធ រវាងអគ្គលេខាធិការដ្ឋាន នៃ គ.ល.ក. និងអាជ្ញាធរមានសមត្ថកិច្ចពាក់ព័ន្ធនៅខេត្តបាត់ដំបង សំដៅផ្លាស់ប្ដូរព័ត៌មាន និងសហការ ក្នុងការគ្រប់គ្រងតាមដាន ត្រួតពិនិត្យ និងចាត់វិធានការតាមសមត្ថកិច្ចរៀងៗខ្លួន លើការធ្វើអាជីវកម្មល្បែងស៊ីសងខុសច្បាប់គ្រប់ប្រភេទ ក៏ដូចជាល្បែងផ្សង សំណាងដែលមិនមានអាជ្ញាបណ្ណ ឬអាជ្ញាបណ្ណសាខា និងលិខិតអនុញ្ញាតប៉ុស្ដិ៍សេវាពីគណៈកម្មការគ្រប់គ្រង ល្បែងពាណិជ្ជកម្ម កម្ពុជា គ.ល.ក.។ 

ក្រៅពីគោលការណ៍ខាងលើ កិច្ចប្រជុំនេះគឺជាលើកកម្ពស់ការយល់ដឹងឱ្យកាន់តែទូលំទូលាយ នូវច្បាប់និងលិខិតបទដ្ឋាន គតិយុត្តជាធរមាន ពាក់ព័ន្ធនឹងការគ្រប់គ្រង អាជីវកម្មល្បែងផ្សងសំណាង ដើម្បីជំរុញអនុលោមភាព និងការទទួលខុសត្រូវរបស់ ប្រតិបត្ដិករល្បែងផ្សងសំណាង និងចូលរួមកាត់បន្ថយផលប៉ះពាល់អវិជ្ជមានជាអតិបរមាចំពោះសង្គមជាតិ។

សូមបញ្ជាក់ថា នាពេលថ្មីៗនេះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី រដ្ឋមន្ត្រីក្រសួងសេដ្ឋកិច្ច និង ហិរញ្ញវត្ថុ និងជាប្រធានគណៈកម្មការគ្រប់គ្រងល្បែងពាណិជ្ជកម្មកម្ពុជា គ.ល.ក. បានដាក់ចេញវិធានការ និងណែនាំពង្រឹងយន្តការ នៃការគ្រប់គ្រង ការតាមដាន និងការត្រួតពិនិត្យជាប់ជាប្រចាំ ចំពោះរាល់សកម្មភាពអាជីវកម្មល្បែងផ្សងសំណាងនៅទូទាំងប្រទេស ដោយត្រូវចាត់វិធានការតាមច្បាប់ឱ្យបានទាន់ពេល ចំពោះប្រតិបត្តិករល្បែងផ្សងសំណាង ដែលអនុវត្តផ្ទុយពីសេចក្ដីណែនាំ។ ក្រៅពីនេះការ ពង្រឹងកិច្ចសហការស្អិតរល្មួត រវាងអគ្គលេខាធិការដ្ឋាននៃ គ.ល.ក. និងអាជ្ញាធរមានសមត្ថកិច្ចពាក់ព័ន្ធ, ជាពិសេស អគ្គស្នងការដ្ឋាននគរបាលជាតិ និងគណៈបញ្ជាការឯកភាពរាជធានី-ខេត្ត និងក្រុង-ស្រុក-ខណ្ឌ ក្នុងការគ្រប់គ្រង, តាមដាន និងការ ត្រួតពិនិត្យជាប់ជាប្រចាំ ចំពោះរាល់សកម្មភាពលួចលាក់ បង្កប់ការលេងល្បែងស៊ីសងខុសច្បាប់គ្រប់ប្រភេទ ដោយចាត់វិធានការ ម៉ឺងម៉ាត់ តាមច្បាប់ឱ្យបានទាន់ពេល៕

អត្ថបទ៖ សុន រ៉ាឌី