សហរដ្ឋអាមេរិក កាលពីថ្ងៃអង្គារ (ទី៥ ខែមីនា) បានកែសម្រួលភាសានៅក្នុងសេចក្តីសម្រេចព្រាងរបស់ក្រុមប្រឹក្សាសន្តិសុខអង្គការសហប្រជាជាតិ ដើម្បីគាំទ្រឲ្យមាន «បទឈប់បាញ់បន្ទាន់មួយរយៈពេលប្រហែល ៦សប្តាហ៍ នៅតំបន់ហ្កាហ្សា ដោយមានភ្ជាប់ជាមួយនឹងការដោះលែងចំណាប់ថ្នូរទាំងអស់»។ នេះបើយោងតាមអត្ថបទដែលសារព័ត៌មាន Reuters បានឃើញ។

ការកែសម្រួលអត្ថបទលើកទី៣ ដែលស្នើឡើងជាលើកដំបូងដោយសហរដ្ឋអាមេរិក កាលពី ២សប្តាហ៍មុន ឥឡូវនេះ ឆ្លុះបញ្ចាំងពីការលើកឡើងដោយផ្ទាល់របស់អនុប្រធានាធិបតីអាមេរិកលោកស្រី Kamala Harris។ សេចក្តីសម្រេចព្រាងដំបូងរបស់សហរដ្ឋអាមេរិកបានបង្ហាញការគាំទ្រឲ្យមាន «បទឈប់បាញ់បណ្តោះអាសន្ន» នៅក្នុងសង្គ្រាមអ៊ីស្រាអែល និងក្រុមហាម៉ាស។

សហរដ្ឋអាមេរិកចង់បានការគាំទ្រពីក្រុមប្រឹក្សាសន្តិសុខ សម្រាប់បទឈប់បាញ់ដែលភ្ជាប់ទៅនឹងការដោះលែងចំណាប់ថ្នូរ ដែលក្រុមហាម៉ាសឃុំខ្លួននៅតំបន់ហ្កាហ្សា។ គួរបញ្ជាក់ថា ក្រុមហាម៉ាសបានវាយប្រហារអ៊ីស្រាអែល កាលពីថ្ងៃទី៧ ខែតុលា ហើយបើយោងតាមអាជ្ញាធររបស់អ៊ីស្រាអែល បានឲ្យដឹងថា ការវាយប្រហារនោះបានសម្លាប់មនុស្ស ១.២០០នាក់ និងចាប់ចំណាប់ថ្នូរ ២៥៣នាក់។

ទីក្រុងវ៉ាស៊ីនតោនមិនយល់ស្របនឹងពាក្យ «បទឈប់បាញ់» នោះទេ ហើយខ្លួនបានវេតូសសេចក្តីសម្រេចព្រាងរបស់ក្រុមប្រឹក្សាចំនួន ៣លើក ដោយសេចក្ដីសម្រេចព្រាងចំនួន ២ដង នឹងទាមទារឲ្យមានបទឈប់បាញ់បន្ទាន់ នៅក្នុងសង្រ្គាមរយៈពេល ៥ខែនេះ។

ថ្មីៗនេះ សហរដ្ឋអាមេរិកបានបង្ហាញថា ការវេតូរបស់ខ្លួន គឺត្រឹមត្រូវ ដោយនិយាយថា វិធានការរបស់ក្រុមប្រឹក្សាបែបនេះអាចបង្កគ្រោះថ្នាក់ដល់កិច្ចប្រឹងប្រែងរបស់អាមេរិក អេហ្ស៊ីប និងកាតា ក្នុងការធ្វើការចរចាឲ្យមានការផ្អាកសង្គ្រាម និងដោះលែងចំណាប់ថ្នូរ។ ប្រធានាធិបតីអាមេរិកលោក Joe Biden បាននិយាយកាលពីថ្ងៃអង្គារថា វាស្ថិតនៅលើក្រុមហាម៉ាសថា តើទទួលយកកិច្ចព្រមព្រៀង ដើម្បីឲ្យមានបទឈប់បាញ់ដែរ ឬទេ ខណៈដែលការពិភាក្សាថ្ងៃទី៣ របស់គណៈប្រតិភូ ប្រព្រឹត្តទៅដោយគ្មានសញ្ញាបំបែកភាពទាល់ច្រក៕