ក្រុមហ៊ុនបង្កើតកម្មវិធីបច្ចេកវិទ្យា ChatGPT គឺក្រុមហ៊ុន OpenAI កាលពីថ្ងៃអង្គារ (ទី៥ ខែមីនា) បានច្រានចោលការអះអាងរបស់លោក Elon Musk ដែលថា ក្រុមហ៊ុននេះបានបោះបង់ចោលកិច្ចការដើមរបស់ខ្លួន ដែលមានបំណងអភិវឌ្ឍបញ្ញាសិប្បនិម្មិត (AI) សម្រាប់ជាប្រយោជន៍ដល់មនុស្សជាតិ និងមិនមែនដើម្បីរកប្រាក់ចំណេញនោះទេ។

តាមរយៈការបង្ហោះក្នុងប្លុក ក្រុមហ៊ុន OpenAI បានឲ្យដឹងថា ខ្លួនមានបំណងចាត់វិធានច្រានចោលរាល់ការអះអាងរបស់លោក Musk។ កាលពីសប្តាហ៍មុន លោក Musk បានដាក់ពាក្យបណ្តឹងប្រឆាំងនឹងក្រុមហ៊ុនថ្មីនេះដែលលោកបានរួមចំណែកបង្កើតឡើង ដោយចោទប្រកាន់ថា បានរំលោភកិច្ចសន្យា ពោលគឺផ្ទុយពីគោលបំណងដើម ដោយក្រុមហ៊ុនដែលគាំទ្រដោយក្រុមហ៊ុន Microsoft ឥឡូវនេះកំពុងផ្តោតលើការរកប្រាក់ចំណេញ។

ក្រុមហ៊ុន OpenAI បាននិយាយថា លោក Musk ចង់ឲ្យមានការរួមបញ្ចូលគ្នាជាមួយក្រុមហ៊ុនផលិតរថយន្តអគ្គិសនី Tesla ហើយរូបលោកបានបញ្ជូនអ៊ីម៉ែល (សារអេឡិកត្រូនិក) ដែលនិយាយថា ក្រុមហ៊ុនគួរតែ «ចូលរួមជាមួយក្រុមហ៊ុន Tesla ដើម្បីរកប្រាក់ចំណេញ»។

ក្រុមហ៊ុន OpenAI បានប្រាប់ថា ការផ្តល់យោបល់នេះបានកើតឡើង បន្ទាប់ពីលោក Musk និងក្រុមហ៊ុនបានសម្រេចថា ជំហានបន្ទាប់ គឺបង្កើតអង្គភាពរកប្រាក់ចំណេញនៅឆ្នាំ២០១៧ ដើម្បីបង្កើតដើមទុនសាងបញ្ញាសិប្បនិម្មិតទូទៅ (AGI)។

ក្រុមហ៊ុនបានបន្ថែមទៀតថា បន្ទាប់មក សហគ្រិនដែលជាមហាសេដ្ឋីរូបនេះ ចង់បានភាគហ៊ុនភាគច្រើន ការគ្រប់គ្រងក្រុមប្រឹក្សាភិបាលទី១ និងធ្វើជានាយកប្រតិបត្តិរបស់ក្រុមហ៊ុន OpenAI។ តែក្រុមហ៊ុន OpenAI និងលោក Musk មិនអាចព្រមព្រៀងគ្នាលើលក្ខខណ្ឌនៃការស្វែងរកប្រាក់ចំណេញបានទេ ដោយសារក្រុមហ៊ុនយល់ថា វាផ្ទុយនឹងគោលបំណងរបស់ក្រុមហ៊ុន ក្នុងការឲ្យបុគ្គលណាម្នាក់គ្រប់គ្រងទាំងស្រុងលើក្រុមហ៊ុន៕