ប្រធានាធិបតីទួរគី លោក Recep Tayyip Erdogan បាននិយាយកាលពីថ្ងៃអង្គារថា ប្រទេសទួរគី បានត្រៀមខ្លួនរួចជាស្រេច ក្នុងការទទួលខុសត្រូវរបស់ខ្លួន នៅក្នុងក្របខ័ណ្ឌនៃយន្តការជាអ្នកធានា ជាផ្នែកនៃកិច្ចប្រឹងប្រែងរបស់ខ្លួន ដើម្បីបញ្ចប់ជម្លោះរវាងអ៊ីស្រាអែល និងក្រុមហាម៉ាស។ លោក Erdogan បាននិយាយនៅក្នុងសន្និសិទសារព័ត៌មានរួមមួយ ចូលរួមដោយ ប្រធានាធិបតី ប៉ាឡេស្ទីន លោក Mahmoud Abbas នៅរដ្ឋធានីអង់ការ៉ាថា វាច្បាស់ណាស់ថា សន្តិភាពដោយមានការធានា គឺត្រូវការ ជាជាងការខិតខំប្រឹងប្រែងសន្តិភាពតែលើពាក្យសម្តី។ លោក Erdogan និយាយថា មធ្យោបាយតែមួយគត់ចំពោះសន្តិភាពយូរអង្វែង គឺការបង្កើតរដ្ឋប៉ាឡេស្ទីនឯករាជ្យ អធិបតេយ្យភាព និងសមាហរណកម្មភូមិសាស្រ្តមួយ នៅលើព្រំដែនឆ្នាំ ១៩៦៧ ជាមួយទីក្រុងហ្សេរុយសាឡឹមខាងកើត ជារដ្ឋធានីរបស់ខ្លួន។ បច្ចុប្បន្ននេះ ត្រូវបានគេទទួលស្គាល់យ៉ាងទូលំទូលាយថា ប្រសិនបើរកមិនឃើញដំណោះស្រាយដោយយុត្តិធម៌ចំពោះបញ្ហាអ៊ីស្រាអែល និងដែនដីប៉ាឡេស្ទីននោះទេ នោះសន្តិភាព ពុំមានឡើយនៅមជ្ឈិមបូព៌ា ។ លោកបាននិយាយថាប្រទេសទួរគី ឈរក្នុងសាមគ្គីភាពជាមួយប្រជាជនប៉ាឡេស្ទីន ហើយរដ្ឋាភិបាលទួរគីបានទទួលអ្នកជំងឺជាង ៩០០ នាក់ពីតំបន់ហ្កាហ្សា មកព្យាបាល។ លោក Erdogan ក៏បានបញ្ជាក់ពីកិច្ចខិតខំ របស់ប្រទេសលោក ក្នុងការសាងសង់មន្ទីរពេទ្យនៅតំបន់ហ្កាហ្សា។ ជាមួយគ្នានេះ លោក Abbas បានបញ្ជាក់លើតម្រូវការសម្រាប់សហគមន៍អន្តរជាតិ ដើម្បីការពារប្រជាជនប៉ាឡេស្ទីន។ លោកនិយាយថា កិច្ចខិតខំប្រឹងប្រែងចាំបាច់ត្រូវធ្វើឲ្យរឹងមាំ ដើម្បីផ្តល់ការការពារជាអន្តរជាតិ ដល់ប៉ាឡេស្ទីន ហើយប៉ាឡេស្ទីន គួរតែក្លាយជាសមាជិកមួយរបស់អង្គការសហប្រជាជាតិ។