រដ្ឋមន្ត្រីការពារជាតិអ៊ីស្រាអែល លោក យ៉ូអាវ ហ្គាឡែនធ៍ (Yoav Gallant) បាននិយាយថា ការបន្តការវាយប្រហាររបស់ក្រុមហេសបូឡា មកលើអ៊ីស្រាអែល កំពុងជំរុញប្រទេសនេះ ឈានទៅ «ចំណុចសំខាន់» មួយក្នុងការសម្រេចចិត្ត បន្តសកម្មភាពយោធា នៅក្នុងប្រទេសលីបង់។

លោកហ្គាឡែនធ៍ បាននិយាយនៅក្នុងជំនួបជាមួយលោក Amos Hochstein ជាបេសកជនពិសេសរបស់សហរដ្ឋអាមេរិកថា៖«យើងប្តេជ្ញាចំពោះដំណើរការការទូត។ ទោះជាយ៉ាងណាក៏ដោយ ការឈ្លានពានរបស់ហេសបូឡា កំពុងនាំយើងឲ្យខិតទៅជិតចំណុចសំខាន់មួយ ក្នុងការសម្រេចចិត្តទាក់ទងនឹងសកម្មភាពយោធារបស់យើង នៅក្នុងប្រទេសលីបង់»។

ក្នុងអំឡុងពេលកិច្ចប្រជុំនៅទីបញ្ជាការកងទ័ពនៃក្រសួងការពារជាតិ នៅទីក្រុងតែលអាវីវ ( Tel Aviv) លោក Gallant ក៏បានព្រមានលោក Hochsteinថា ក្រុមសកម្មប្រយុទ្ធលីបង់ កំពុង«អូសភាគីទៅរកការកើនឡើងនៃភាពតានតឹងដ៏គ្រោះថ្នាក់»។

ការព្រមានរបស់លោក បានកើតឡើងចំពេលមានរបាយការណ៍ជាច្រើននៃការវាយប្រហារដោយមីស៊ីល របស់ក្រុមហេសបូឡាទៅលើអ៊ីស្រាអែលក្នុងរយៈពេលប៉ុន្មានថ្ងៃថ្មីៗនេះ ដោយការវាយប្រហារកាលពីម្សិលមិញ នៅជិតសហគមន៍ព្រំដែន Margaliot បានបណ្តាលឲ្យមនុស្សម្នាក់ស្លាប់ និង ៧នាក់ រងរបួស។