ខេត្តកំពង់ស្ពឺ៖ កាលពីព្រឹកថ្ងៃទី ៤ ខែមីនា ២០២៤ ឯកឧត្តម សួនសេរីរដ្ឋា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បាន​ដឹក​នាំប្រតិភូ​ក្រសួង​ជួប​ប្រជុំ​ពង្រឹងការអនុវត្តផែនការសកម្មភាព និងផែនការថវិកា លើការងារអភិវឌ្ឍន៍ និង​អភិរក្ស​ជន​ជាតិដើមភាគតិច នៅសាលប្រជុំមន្ទីរអភិវឌ្ឍន៍ជនបទខេត្តកំពង់ស្ពឺ និង​ខេត្ត​ព្រះសីហនុ។

វត្តមានអញ្ជើញចូលរួមរួមមានឯកឧត្តម អនុរដ្ឋលេខាធិការ ទទួលបន្ទុក លោកអគ្គនាយករង រដ្ឋបាល និងហិរញ្ញវត្ថុ ក្រុមការងារនាយកដ្ឋានអភិវឌ្ឍន៍ជនជាតិភាគតិច នៃ​ក្រសួង​អភិវឌ្ឍន៍ជនបទ តំណាងមន្ទីរសេដ្ឋកិច្ច និងហិរញ្ញវត្ថុខេត្ត ថ្នាក់ដឹកនាំ និងមន្ត្រី នៃ​មន្ទីរ​អភិវឌ្ឍន៍​ជន​បទ​ខេត្ត។

កិច្ចប្រជុំនេះធ្វើឡើង ដើម្បីស្វែងយល់ពីការងារ កិច្ចសហប្រតិបត្តិការរវាងមន្ទីទាំង ២ កន្លង​មក​ដើម្បី​រក​ចំណុចខ្លាំង ចំណុចខ្សោយលើការងារការអនុវត្តន៍ផែនការសកម្មភាព ការស្នើ​ថវិ​កា​ចំណាយ ចំពោះសកម្មភាពការងារជនជាតិដើមភាគតិចនៅក្នុងខេត្ត។ ក្រោយស្តាប់របាយការណ៍ និ​ង​កិច្ចពិភាក្សារបស់អង្គប្រជុំ ឯកឧត្តម រដ្ឋលេខាធិការ ក៏បាននាំយកការផ្តែផ្តាំ និង​អនុសាសន៍​ចង្អុល​បង្ហាញ​របស់ ឯកឧត្តមរដ្ឋមន្ត្រី ជូនដល់ថ្នាក់ដឹកនាំ និងមន្ត្រីមន្ទីរផងដែរ។ ជា​លទ្ធ​ផល​ក្រោយ​ការ​ស្តាប់សេចក្តីរាយការណ៍ របាយការរបស់មន្ទីទាំង ២ ដែលសហការ​ធ្វើ​ការ​ជាមួយ​គ្នា​កន្លង​មក ឯកឧត្តមរដ្ឋលេខាធិការ បានកោតសរសើរខ្ពស់ចំពោះថ្នាក់ដឹកនាំមន្ទីរ ដែល​កន្លង​មក​បាន​សហការគ្នាធ្វើការបានលទ្ធផលយ៉ាងល្អ។

នារសៀលថ្ងៃដដែលនោះផងដែរ ឯកឧត្តម សួនសេរីរដ្ឋា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ក៏បានដឹកនាំ​ប្រតិភូ​ក្រសួង​ដែល​មាន​សមាស​សភាពខាងលើ ចុះជួបប្រជុំពង្រឹងការអនុវត្តផែនការសកម្មភាព និងផែនការថវិកា លើ​ការ​ងារ​អភិវឌ្ឍន៍ និងអភិរក្សជនជាតិដើមភាគតិច នៅសាលប្រជុំ​មន្ទីរ​អភិវឌ្ឍន៍​ជន​បទ​ខេត្ត​ព្រះសីហនុ​បន្ត ដែលមានតំណាងមន្ទីរសេដ្ឋកិច្ច និងហិរញ្ញវត្ថុខេត្ត ថ្នាក់ដឹកនាំ និងមន្ត្រី នៃមន្ទីរ​អភិវឌ្ឍន៍​ជនបទ​។

ក្រោយបានស្តាប់របាយការណ៍ របស់លោកប្រាក់ សុវណ្ណ ប្រធានមន្ទីរ​អភិវឌ្ឍន៍​ជន​បទ​ខេត្ត​ព្រះសីហនុ ឯកឧត្តមរដ្ឋលេខាធិការ បានធ្វើការកោតសរសើរ ដល់ក្រុមការងារមន្ទីរ និង​អ្នក​ពាក់ព័ន្ធ ដែលបានខិតខំស្រាវជ្រាវ និងរៀបចំបែបបទ នីតិវិធី កំណត់អត្តសញ្ញាណ ប្រពៃណី ទំនៀម​ទម្លាប់ របស់បងប្អូនជនជាតិដើម រហូតត្រូវបានទទួលស្គាល់អត្តសញ្ញាណត្រឹមត្រូវ។

 ឯកឧត្តមរដ្ឋលេខាធិការ ក៏បានបញ្ជាក់បន្ថែម ផងដែរពីកិច្ចប្រជុំនេះគឺដើម្បីជជែកអំពីតួនាទី ភារកិច្ចរវាងនាយកដ្ឋានអភិវឌ្ឍន៍ជនជាតិភាគតិច និងមន្ទីរអភិវឌ្ឍន៍ជនបទខេត្ត ក្នុ​ង​ការ​អនុវត្ត​សកម្មភាព ដំណើរការចុះកំណត់អត្តសញ្ញាណ ប្រជាពលរដ្ឋជនជាតិដើមភាគតិច ដែលនៅ​សេស​សល់ និងការវិភាគថវិការបស់មន្ទីរ ដល់ការិយាល័យអភិវឌ្ឍន៍ជនជាតិដើមភាគតិច និងការ​ទូទាត់​ថវិកា​កម្មវិធី ទៅមន្ទីរសេដ្ឋកិច្ច និងហិរញ្ញវត្ថុខេត្ត។

នៅថ្ងៃទី៥ ខែឆ្នាំដដែល ឯកឧត្តម សួនសេរីរដ្ឋា រដ្ឋលេខាធិការ បានបន្តដឹកនាំប្រតិភូក្រសួង ដែល​មាន​សមាសសភាពខាងលើ ចុះជួបសំណេះសំណាល ប្រជុំការងារជាមួយថ្នាក់ដឹកនាំ និងមន្ត្រី​នៃ​មន្ទីអភិវឌ្ឍន៍ជនបទខេត្តកោះកុង និងមានការចូលរួមពីតំណាងមន្ទីសេដ្ឋកិច្ច និង​ហិរញ្ញ​វត្ថុ​ខេត្ត ដើម្បីស្វែងយល់ការងារ សហការរវាងមន្ទីទាំង ២ ។ ឯកឧត្តមក៏បានណែនាំ និងផ្តល់​អនុសាសន៍​ឲ្យមន្ទីអភិវឌ្ឍន៍ជនបទខេត្ត យកចិត្តទុកដាក់អនុវត្តកម្មវិធីទាំង ៤ របស់ក្រសួង រៀប​ចំ​សកម្មភាព ធ្វើផែនការ ដាក់ជូនមន្ទីសេដ្ឋកិច្ចឲ្យបានមុនកាលកំណត់ និងព្យាយាមធ្វើការជាក្រុម ឧស្សា​ប្រជុំ​ផ្ទៃក្នុង ព្យាយាមដោះស្រាយបញ្ហាសេសសល់ លើកកំពស់ការ​កសាង​សមត្ថភាព​ផ្ទាល់​ខ្លួន​ ដើម្បីបំពេញការងារតាមភារកិច្ចនិងតួនាទី សម្រេចឲ្យ​បាន​នូវផែន​ការ​យុទ្ធសាស្ត្រ​បញ្ចកោណ​របស់​រាជរដ្ឋាភិបាល៕