ប្រធានាធិបតីប៉ូឡូញ លោក Andrzej Duda កាលពីថ្ងៃអង្គារ (ទី៥ ខែមីនា) បាននិយាយថា ប្រទេសរបស់លោកត្រៀមខ្លួនរួចជាស្រេចដើម្បីការពារប្រទេសដៃគូរបស់អង្គការណាតូ (NATO) គ្រប់ពេលវេលាទាំងអស់ ដោយការលើកឡើងនេះកើតមានឡើងក្នុងពេលដែលលោកធ្វើការកត់សម្គាល់អំពីការមានចំណែកក្នុងសមយុទ្ធដ៏ធំបំផុតរបស់សម្ព័ន្ធភាពយោធានេះ គិតចាប់តាំងពីសម័យសង្គ្រាមត្រជាក់។

លោក Duda បានប្រាប់ថា សមយុទ្ធបានបង្ហាញឲ្យឃើញពីការត្រៀមខ្លួន ដើម្បីការពារទឹកដីរបស់ប្រទេសសមាជិកអង្គការណាតូ ដែលរួមមានប៉ូឡូញ លីទុយអានី និងបណ្ដារដ្ឋបាល់ទិក។

លោកបាននិយាយថា៖ «ប្រទេសលីទុយអានីអាចពឹងផ្អែកលើពួកយើង ប្រសិនបើមានតម្រូវការបែបនេះ ទាហានប៉ូឡូញនឹងប្រកៀកស្មាជាមួយកងកម្លាំងលីទុយអានី ដើម្បីការពារដែនដីពីការវាយប្រហាររបស់សត្រូវ»។

គួរបញ្ជាក់ថា ដោយមានកងទ័ពប្រហែល ៩០.០០០នាក់ចូលរួម សមយុទ្ធឈ្មោះ Steadfast Defender បង្ហាញពីភាពរឹងមាំរបស់អង្គការណាតូ ខណៈដែលបណ្តាប្រទេសនៅប៉ែកខាងកើតរបស់អង្គការនេះ បង្កើនការចំណាយលើវិស័យការពារជាតិរបស់ពួកគេ នៅពេលប្រឈមនឹងការលុកលុយរបស់រុស្ស៊ីលើអ៊ុយក្រែន។

សប្តាហ៍ក្រោយ លោក Duda និងនាយករដ្ឋមន្ត្រីប៉ូឡូញ លោក Donald Tusk នឹងធ្វើដំណើរទៅទីក្រុងវ៉ាស៊ីនតោន ដើម្បីប្រារព្ធខួបលើកទី២៥ នៃការចូលរួមរបស់ប៉ូឡូញជាមួយអង្គការណាតូ ហើយពិភាក្សាអំពីស្ថានភាពនៅអ៊ុយក្រែន អំឡុងពេលជួបជាមួយប្រធានាធិបតីអាមេរិក លោក Joe Biden៕