ក្រសួងការបរទេសចិន នៅថ្ងៃពុធ (ទី៦ ខែមីនា) បាននិយាយថា ដោយទូទៅ ស្ថានភាពនៅសមុទ្រចិនខាងត្បូងមាន «ស្ថិរភាព» បន្ទាប់ពីមានសេចក្តីថ្លែងការណ៍រួមពីប្រទេសអូស្ត្រាលី និងបណ្ដាប្រទេសអាស៊ាន ដែលអំពាវនាវឲ្យមានការអត់ធ្មត់ នៅតំបន់មានជម្លោះ ក្នុងសមុទ្រចិនខាងត្បូង។

សេចក្តីថ្លែងការណ៍ដែលត្រូវបានធ្វើឡើងបន្ទាប់ពីកិច្ចប្រជុំកំពូលរយៈពេល ៣ថ្ងៃ នៅទីក្រុងមែលប៊ន បានអំពាវនាវឲ្យមានសណ្តាប់ធ្នាប់ដោយ «ផ្អែកលើច្បាប់» នៅក្នុងតំបន់ឥណ្ឌូប៉ាស៊ីហ្វិកមួយនេះ។ បន្ទាប់ពីមានការអំពាវនាវនោះ អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ទីក្រុងប៉េកាំងបាន «យកចិត្តទុកដាក់» លើសេចក្តីថ្លែងការណ៍នេះ ហើយប្រាប់ថា ជំហររបស់ចិន ចំពោះតំបន់ជម្លោះ គឺសមស្រប និងច្បាស់លាស់។

គួរបញ្ជាក់ថា ការតបតរបស់ចិនបានកើតឡើងនៅពេលដែលហ្វីលីពីន កាលពីថ្ងៃអង្គារ (ទី៥ ខែមីនា) បានកោះអញ្ជើញអនុប្រធានបេសកកម្មរបស់ទីក្រុងប៉េកាំង ប្រចាំនៅទីក្រុងម៉ានីល ឲ្យទៅស្ដាប់ការតវ៉ា ចំពោះអ្វីដែលខ្លួនហៅថា «សកម្មភាពឈ្លានពាន» របស់កងកម្លាំងជើងទឹកចិន ប្រឆាំងនឹងបេសកកម្មផ្ដល់សម្ភារៈផ្គត់ផ្គង់ សម្រាប់កងទ័ពហ្វីលីពីនដែលឈរជើងនៅតំបន់ថ្មប៉ប្រះទឹក ក្នុងសមុទ្រចិនខាងត្បូង។

ទីក្រុងប៉េកាំងទាមទារស្ទើរតែទាំងស្រុងនៃតំបន់របស់សមុទ្រចិនខាងត្បូង ពោលគឺជាផ្លូវពាណិជ្ជកម្ម ដែលមានតម្លៃជាង ៣ពាន់ពាន់លានដុល្លារ ក្នុងមួយឆ្នាំៗ ហើយតំបន់នេះ គឺជាប្រភពបង្កឲ្យមានភាពតានតឹងជាមួយហ្វីលីពីន៕