ប្រធានគណៈកម្មការអឺរ៉ុប លោកស្រី Ursula von der Leyen នឹងធ្វើដំណើរទៅកាន់ប្រទេសស៊ីប ក្នុងសប្តាហ៍នេះ ខណៈដែលសហភាពអឺរ៉ុប (EU) ស្វែងរកការបង្កើតច្រករបៀងមនុស្សធម៌ដែលអាចធ្វើទៅបានតាមរយៈកោះមេឌីទែរ៉ាណេ ដើម្បីជួយផ្គត់ផ្គង់ប្រជាជន នៅតំបន់ហ្កាហ្សា។ នេះបើតាមការឲ្យដឹងពីអ្នកនាំពាក្យរបស់លោកស្រី នៅថ្ងៃពុធ (ទី៦ ខែមីនា) នេះ។

អ្នកនាំពាក្យរូបនេះបានប្រាប់អ្នកសារព័ត៌មានថា៖ «កិច្ចប្រឹងប្រែងរបស់យើង គឺផ្តោតលើការធ្វើឲ្យប្រាកដថា យើងអាចផ្តល់ជំនួយដល់ប្រជាជនប៉ាឡេស្ទីន។ យើងទាំងអស់គ្នាសង្ឃឹមថា ការបើកច្រករបៀងនឹងកើតមានក្នុងពេលឆាប់ៗនេះ»។

ចំណែកនៅឯទីក្រុង Nicosia (នីកូស៊ី) ឯណោះវិញ អ្នកនាំពាក្យរដ្ឋាភិបាលបានឲ្យដឹងថា៖ «នៅថ្ងៃសុក្រ (ទី៨ ខែមីនា) នេះ លោកស្រី Ursula von der Leyen នឹងធ្វើទស្សនកិច្ចរួមជាមួយប្រធានាធិបតីស៊ីប ដើម្បីពិនិត្យមើលហេដ្ឋារចនាសម្ព័ន្ធដែលទាក់ទងនឹងដំណាក់កាលខ្លះៗនៃផែនការ»។

គួរបញ្ជាក់ថា ប្រទេសស៊ីបដែលស្ថិតនៅចម្ងាយប្រហែល ៣៧០គីឡូម៉ែត្រ ភាគពាយព្យនៃតំបន់ហ្កាហ្សា គឺជារដ្ឋសមាជិករបស់សហភាពអឺរ៉ុប ដែលនៅកៀកបំផុតនឹងតំបន់នេះ។ ប្រទេសនេះបានធ្វើយុទ្ធនាការជាច្រើនខែមកហើយ ដើម្បីបង្កើតផ្លូវសមុទ្រដែលមាននិរន្តរភាព ពោលគឺផ្លូវមួយ ដែលដឹកជំនួយដោយផ្ទាល់ទៅកាន់ដែនដីនោះ៕