ភ្នំពេញ៖ ក្រុមប្រឹក្សាអ្នកច្បាប់កាលពីថ្ងៃទី៦ ខែមីនា ឆ្នាំ២០២៤ នៅទីស្តីការគណៈរដ្ឋមន្ត្រី បានរៀបចំបើកវគ្គបណ្តុះបណ្តាលស្តីពី «ការវិវត្ត នៃវិធាន ពាណិជ្ជកម្ម នៅកម្ពុជា» ក្រោម​អធិបតី​ភាព ឯកឧត្តម វង្សី វិស្សុត ឧបនាយក រដ្ឋមន្ត្រី ប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និង​ជាប្រធានក្រុមប្រឹក្សាអ្នកច្បាប់ ដើម្បីពង្រឹងសមត្ថភាពគុណភាព និង​ចំណេះដឹ​ង​ឱ្យកាន់​តែទូលំ​ទូលាយ​ក្នុង​ក្រប​ខ័ណ្ឌទីស្តីការគណៈរដ្ឋមន្ត្រី ក៏ដូចតាមបណ្តាក្រសួងស្ថាប័នផ្សេងៗ។

តាមរយៈវគ្គបណ្ដុះបណ្ដាលនេះបានធ្វើបទបង្ហាញដោយឯកឧត្តមបណ្ឌិតសភាចារ្យ សុក ស៊ីផាន់​ណា ទេសរដ្ឋមន្រ្តី ទទួលបន្ទុកបេសកកម្មពិសេស ជូនដល់តំណាងក្រសួង ស្ថាប័ន ថ្នាក់​ដឹកនាំ និងមន្ត្រី រាជការនៃអង្គភាពចំណុះទីស្តីការគណៈរដ្ឋមន្ត្រីទាំងអស់ ថ្នាក់ដឹកនាំ ទីប្រឹក្សា សមាជិក សមាជិកបម្រុង ជំនួយការ និងមន្ត្រីរាជការនៃក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច សង្គម​កិច្ច និងវប្បធម៌ ព្រមទាំងសមាជិក សមាជិកា សហភាព សហព័ន្ធយុវជន កម្ពុជា វិស័យ ទីស្តី​ការ​គណៈរដ្ឋមន្រ្តី មានចំនួនសរុបប្រមាណ៤៥០នាក់។

នេះជាវគ្គបណ្តុះបណ្តាលលើកទី២ បន្តពីវគ្គបណ្តុះបណ្តាលលើកទី១ លើប្រធានបទ «ការរៀប​ចំគោល​នយោបាយសេដ្ឋកិច្ចនិងពាណិជ្ជកម្មកម្ពុជា» នៅក្នុងអាណត្តិថ្មី ដែលក្រុមប្រឹក្សា​អ្នកច្បាប់​នៃ​ទីស្តី​ការគណៈរដ្ឋមន្រ្តីរៀបចំឡើង ក្រោមគំនិតផ្តួចផ្តើមរបស់ឯកឧត្តម វង្សី វិស្សុត ឧបនាយក​រដ្ឋ​មន្រ្តី​ប្រចាំ​ការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់ ដើម្បី​ពង្រឹង​សមត្ថភាពគុណភាព និងចំណេះដឹងឱ្យកាន់តែទូលំទូលាយ សំដៅបង្កើន​នូវ​ប្រសិទ្ធិភាព និង​ផលិតភាពការងារឱ្យកាន់តែប្រសើរជាងមុនទាំងក្នុងក្របខ័ណ្ឌទីស្តីការគណៈរដ្ឋមន្ត្រី ក៏ដូច​តាម​បណ្តា​ក្រសួងស្ថាប័នផ្សេងៗ៕