ភ្នំពេញ ៖ ឯកឧត្តមអភិសន្តិបណ្ឌិត ស សុខា អនុប្រធានសហភាពសហព័ន្ធយុវជនកម្ពុជា (ស.ស.យ.ក) និងជាប្រធានក្រុមប្រឹក្សាយុវជនគ្រឹះស្ថានឧត្តមសិក្សា ហៅកាត់ថា ក.យ.គ. បាន​ថ្លែងថា ស.ស.យ.ក ប្ដេជ្ញាចូលរួមឲ្យខ្លាំងក្លាបន្ថែមទៀត លើការងារបណ្ដុះបណ្ដាលជំនាញវិជ្ជាជីវៈ ទៅដល់យុវជន ជាពិសេសយុវជនមកពីគ្រួសារក្រីក្រ និងការផ្ដល់អាហារូបករណ៍ដល់និស្សិត បាន​រៀន​បន្ត​នៅថ្នាក់ឧត្តមសិក្សា ។

ក្នុងពិធីបើកសន្និបាត បូកសរុបលទ្ធផលការងារប្រចាំឆ្នាំ២០២៣ និងលើក​ទិសដៅ​ការងារ​ឆ្នាំ​២០២៤​ របស់ ក.យ.គ. នៃសហភាពសហព័ន្ធយុវជនកម្ពុជា ឯកឧត្តមអភិសន្តិបណ្ឌិត មាន​ប្រសាសន៍​ថា ក្នុងឆ្នាំ២០២៣ ក.យ.គ បានចូលរួមក្នុងព្រឹត្តិការសង្គមជាតិសំខាន់ៗ រួមមាន ចូល​រួម​សង្កេត​ការណ៍បោះឆ្នោតជ្រើសតាំងតំណាងរាស្រ្ត ចូលរួមរៀបចំព្រឹត្តិការណ៍ស៊ីហ្គេម និង​អាស៊ាន​ប៉ារ៉ាហ្គេម ផ្សព្វផ្សាយយុទ្ធនាការ Beyond The Game ចូលរួមបត់បេះដូង ដើម្បី​បំបែក​ឯតទគ្គកម្ម​បេះដូងច្រើនជាងគេលើពិភពលោក រៀបចំកម្មវិធីសង្ក្រាន្តឆ្នាំថ្មីនៅខេត្តសៀមរាប ការងារ​សង្គមកិច្ច និងការកៀរគរយុវជនធ្វើកម្មភាព និងចូលជាសមាជិក ស.ស.យ.ក. ជាដើម ។

ឯកឧត្តមបន្តថា សម្រាប់ជាធាតុចូលធ្វើផែនការយុទ្ធសាស្ត្រ និងផែនការសកម្មភាពអនុវត្តន៍បន្ត ក.យ.គ. បានជ្រើសយកនូវប្រធានបទចំនួន៤ រួមមាន ទី១. តួនាទីរបស់​យុវជន​ក្នុង​ការ​ថែ​រក្សា​សន្តិភាព​ក្នុង​សង្គមកម្ពុជា, ទី២. ការបណ្ដុះបណ្ដាលជំនាញវិជ្ជាជីវៈ និងបច្ចេកទេស សម្រាប់​យុវជន​មក​ពីគ្រួសារក្រីក្រ និងគ្រួសារងាយរងហានិភ័យ ដែលនេះ​ជា​គោល​នយោបាយ​អាទិភាព​មួយ​របស់រាជរដ្ឋាភិបាល អាណត្តិទី៧, ទី៣. យុវជន និងការអភិវឌ្ឍបច្ចេកវិទ្យា ក្នុងវិស័យ​អប់រំ​តាម​លំនាំ​គន្លងថ្មី នៃយុគសម័យឌីជីថល និងទី៤. យុវជន និងការប្រើ​ប្រាស់​បណ្ដាញ​ទំនាក់​ទំនងសង្គម​នាពេលបច្ចុប្បន្ន ។

ឯកឧត្តមអភិសន្តិបណ្ឌិត បានបន្ថែមថា ខ្លឹមសារនៃប្រធានបទទាំង៤ បានផ្តល់សារៈសំខាន់ ទស្សនៈ និងគំនិតជាមូលដ្ឋានដ៏មានប្រយោជន៍ ដល់ក្រុមប្រឹក្សាយុវជនគ្រឹះស្ថានឧត្ដមសិក្សា ក្នុង​ការ​អនុវត្តផែនការសកម្មភាព និងកម្មវិធីការងាររបស់ខ្លួន ក្នុងឆ្នាំ២០២៤នេះ ឱ្យបានសម្រេច​ជោគជ័យ​បន្ថែម​ទៀត ជាពិសេសបានផ្ដល់គុណតម្លៃខ្ពស់ ចំពោះសុខសន្តិភាព និង​តម្រូវ​ការ​ចាំបាច់​របស់យុវជនក្នុងយុគសម័យឌីជីថល ។

ជាមួយនេះឯកឧត្តម បានណែនាំឲ្យ ក.យ.គ. បន្តពង្រឹងកិច្ចសហការល្អជាមួយភាគីពាក់ព័ន្ធ ដើម្បី​អនុវត្តផែនការសកម្មភាព ទាក់ទងនឹងការងារបណ្តុះបណ្តាល ពង្រឹងសមត្ថភាពយុវជន ការ​រៀប​ចំ​ព្រឹត្តិការណ៍សង្គមផ្សេងៗ កម្មវិធីកីឡា ចលនាយុវជនឱ្យចូលរួមសកម្មភាពនានារបស់ ស.ស.យ.ក. ជំរុញ និងលើកទឹកចិត្តយុវជន ឱ្យចុះឈ្មោះចូលជាសមាជិករបស់ ស.ស.យ.ក. តាម​ប្រព័ន្ធ UYFC App ដើម្បីកសាងស្នាដៃ និងសមិទ្ធផលថ្មីៗបន្ថែមទៀត សម្រាប់ឆ្នាំ២០២៤។ 

សូមបញ្ជាក់ថា ពិធីបិទសន្និបាត ក្រុមប្រឹក្សាយុវជនគ្រឹះស្ថានឧត្តមសិក្សា នៃ​សហភាព​សហព័ន្ធ​យុវជន​កម្ពុជា (ស.ស.យ.ក.) នឹងប្រព្រឹត្តិទៅនៅរសៀលថ្ងៃទី៧ ខែមីនា ឆ្នាំ២០២៤ ដដែលនេះ ក្រោម​អធីបតីភាព ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា៕ អត្ថបទ៖ បាន សុខរិទ្ធិ