​បាល់ទាត់៖ ​ក្រុម​ជំរើសជាតិ​អង់គ្លេស​ត្រូវ​បន្ត​រង់ចាំ​លើសពី ៥៥ឆ្នាំ​ទៀត​ក្នុង​ការបន្ត​ស្វែងរក​ជើងឯក​ពានរង្វាន់​ធំ បន្ទាប់ពី​ចាញ់​អ៊ីតាលី​នៅ​វគ្គ​ផ្តាច់ព្រ័ត្រ​ដោយ​បាល់ ១១ម៉ែត្រ​កាត់សេចក្តី Euro ២០២០ នៅ​កីឡដ្ឋាន Wembley ទីក្រុង​ឡុង​ដ៍​ចក្រភព​អង់គ្លេស​។

​​អ្នកចាត់ការ​អង់គ្លេស​លោក Gareth Southgate បាន​និយាយ​ក្រោយ​ចប់​ការប្រកួត​ថា នេះ​ជា​រឿង​ឈឺចាប់​បំផុត​ក្នុង​ជីវិត​របស់លោក ក្នុង​អាជីព​របស់លោកក្រោយ​បរាជ័យ​នេះ​។ លោក​ជា​អ្នក​ជ្រើសរើស​កីឡាករ​ស៊ុត​បាល់ ១១ម៉ែត្រ​នេះ លោក​គឺជា​អ្នកទទួលខុសត្រូវ​គ្រប់យ៉ាង​។ ​​Marcus Rashford និង Jadon Sancho គឺជា​កីឡាករ​ពីរ​នាក់​ដែល​លោក Southgate ផ្លាស់​ចូល​ដើម្បី​ស៊ុត​បាល់ ១១ម៉ែត្រ​នេះ​តែ​ពួកគេ​ធ្វើ​មិនបាន​សំរេច​ដូចគ្នា ខណៈ Bukayo Saka ជា​អ្នក​បាល់​ចុងក្រោយ​ក៏​សង្គ្រោះបាន​ដោយ Gianluigi Donnarumma ទៀត​។​ ​​ចំណែក​ខ្សែប្រយុទ្ធ​អង់គ្លេស Harry Kane ក៏​និយាយ​ស្រដៀង​គ្នា​ដែរ​ថា នេះ​ជា​រឿង​ឈឺចាប់​មិនអាច​បំភ្លេចបាន​ក្នុងអាជីព តែ​ពួកយើង​គួរតែមាន​មោទនភាព​ដែល​មកដល់​ទីនេះ​។ ​​សូមបញ្ជាក់ថា​ នេះ​ជាការ​បង្ហាញខ្លួន​នៅ​វគ្គ​ផ្តាច់ព្រ័ត្រ​ពានរង្វាន់​ធំ​លើកដំបូង​ សំរាប់​អង់គ្លេស​ក្នុង​រយៈពេល ៥៥ឆ្នាំដែល​ឈ្នះ​ជើងឯក World Cup នៅ​ឆ្នាំ១៩៦៦ និង​ជាការ​ឈានឡើង​វគ្គ​ផ្តាច់ព្រ័ត្រ​ជើងឯក​អឺរ៉ុប​លើកដំបូង​ផងដែរ​។​

​​ងាក​មក​លោក Roberto Mancini បាន​និយាយថា​ ជ័យជំនះ​លើក​នេះ​ធ្វើឱ្យ​លោក​នឹកឃើញ​កាល​នៅ​ជា​កីឡាករ ដែល​លោក​មិនអាច​ឈ្នះ​ជើងឯក​ជាមួយ​អ៊ីតាលី​បាន តែ​នេះ​ជា​អារម្មណ៍​អស្ចារ្យ​មួយ​នៅពេល​លោក​ដឹកនាំ​អ៊ីតាលី​ឈ្នះ​ជើងឯក​បែបនេះ​។ ​​រំលឹកថា ​លោក Mancini កាល​ពេល​ជា​កីឡាករ​លោក​មិនដែល​ឈ្នះ​ជើងឯក​ ជាមួយ​ក្រុម​ជំរើសជាតិ​អ៊ីតាលី​ឡើយដោយបាន​ត្រឹម​លេខ៣ នៅ World Cup ឆ្នាំ១៩៩០ និង​ជើងឯក​រង​នៅ​ឆ្នាំ១៩៨៦ ការប្រកួត​ពានរង្វាន់​យុវជន​អាយុ​ក្រោម ២១ឆ្នាំ​អឺរ៉ុប​ប៉ុណ្ណោះ​។ ​​អតីត​អ្នកចាត់ការ Manchester City រូបនេះ​បាន​សម្រក់​ទឹកភ្នែក​បន្ទាប់ពី​ការប្រកួត​បញ្ចប់ ហើយ​ទឹកភ្នែក​នេះ​គឺជាសេចក្តី​រីករាយ រំភើប​សំរាប់​ប្រជាជន​អ៊ីតាលី​ទាំងមូល​។ ​​សូមបញ្ជាក់ថា នេះ​ជាការ​ងើប​ពី​បរាជ័យ​មក​ឈ្នះ​ពាន​ដ៏​ធំ​មួយ​សំរាប់​អ៊ីតាលី ដែល​ខកខាន​មិនបាន​លេង World Cup ២០១៨ នៅ​រុស្ស៊ី មុន​ការមកដល់​របស់ Roberto Mancini ដែល​ក្រោយមក​ដឹកនាំ​ក្រុម​មិន​ចាញ់​សោះ ៣៤ប្រកួត​ជាប់​គ្នា​បូក​ទាំង​ជ័យជំនះ​លើ​អង់គ្លេស​៕

​អត្ថបទ​៖​នាង សុភា​វុ​ធ