ភ្នំពេញ ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងបន្តជំរុញការលើកកម្ពស់ បញ្ជ្រាបសមភាព និងសមធម៌យេនឌ័រ ទៅក្នុងដំណើរការវិវត្ត និងការប្រើប្រាស់បច្ចេកវិទ្យាឌីជីថល ដើម្បីធានាថា បច្ចេកវិទ្យាឌីជីថលនិងអក្ខរកម្មឌីជីថល នឹងមិនមែនជា របាំងធ្វើឱ្យមានគម្លាតយេនឌ័រ។

​ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងពិធីប្រារព្ធខួបលើកទី ១១៣ នៃទិវាអន្តរជាតិនារី៨មីនា ឆ្នាំ២០២៤ នៅល្ងាចថ្ងៃទី៦ ខែមករា ឆ្នាំ២០២៤ នេះបានលើកឡើងថា នៅក្នុងក្របខ័ណ្ឌគោលនយោបាយ សេដ្ឋកិច្ច និងសង្គមឌីជីថលកម្ពុជា ២០២១-២០៣៥ រាជរដ្ឋាភិបាលបានកំពុងផ្តោតលើការកសាងសសរស្តម្ភចំនួន៣សំខាន់ៗគឺ៖ ពលរដ្ឋឌីជីថល រដ្ឋាភិបាលឌីជីថល និងធុរកិច្ចឌីជីថល។ បច្ចុប្បន្នបច្ចេកវិទ្យាឌីជីថលបានបោះជំហានយ៉ាងលឿន និងបានក្លាយជា មធ្យោបាយដ៏សំខាន់មួយក្នុងការតភ្ជាប់សង្គម និងសេដ្ឋកិច្ចពិភពលោកឱ្យកាន់តែប្រទាក់ក្រឡាគ្នា និងពឹងពាក់គ្នាទៅវិញទៅមក។ ក្រៅពីនេះរាជរដ្ឋាភិបាលក៏បានកំណត់បង្កើតកម្មវិធីគាំទ្រ ការចូលរួមរបស់ស្ត្រីក្នុងវិស័យឌីជីថលតាមគ្រប់រូបភាព និងគ្រប់មធ្យោបាយ។ គោលនយោបាយរដ្ឋាភិបាលឌីជីថលកម្ពុជា ២០២២-២០២៤ ក៏បានកំណត់អំពីការអភិវឌ្ឍធនធានមនុស្ស ដោយបានជំរុញការ បណ្តុះបណ្តាលភាពជាអ្នកដឹកនាំឌីជីថល ជាពិសេសដល់ស្ត្រីនៅតាមក្រសួង-ស្ថាប័ន និងការរៀបចំកម្មវិធីតម្រង់ទិស ជំរុញនិងលើក ទឹកចិត្តដល់យុវជន ជាពិសេសយុវនារី ដើម្បីឈានទៅកាត់បន្ថយគម្លាតយេនឌ័រ ពាក់ព័ន្ធនឹងជំនាញឌីជីថល។

ឯកឧត្តម បន្តថា ជាក់ស្តែងការប្រារព្ធទិវានាពេលនេះ គឺជាសក្ខីកម្មនៃការប្តេជ្ញាចិត្ត និងការគាំទ្រដ៏មោះមុតរបស់ក្រសួង ក្នុងការបន្តផ្តល់តម្លៃ និងលើកកម្ពស់សមភាពរវាងស្រី្តនិងបុរស ក្នុងបេសកកម្មរបស់ខ្លួនក៏ដូចជាគ្រប់វិស័យ។ ក្នុងន័យនេះ ក្រសួងនឹង បន្តជំរុញឱ្យភាគីពាក់ព័ន្ធបន្តអនុវត្តវិធានការផ្នែកគោលនយោបាយកម្មវិធី និងសកម្មភាពជាក់លាក់នានា ក្នុងការបន្តលើកកម្ពស់ និង បញ្ជ្រាបសមភាព និងសមធម៌យេនឌ័រនេះ ទៅក្នុងដំណើរការវិវត្តនិងការប្រើប្រាស់បច្ចេកវិទ្យាឌីជីថល នៅតាមអង្គភាពក្រោមឱវាទ និង ការដ្ឋានការងាររបស់ក្រសួង ដើម្បីធានាថា បច្ចេកវិទ្យាឌីជីថលនិងអក្ខរកម្មឌីជីថល នឹងមិនមែនជារបាំងធ្វើឱ្យមានគម្លាតយេនឌ័រឡើយ ។ ជាក់ស្តែងការជំរុញគាំទ្រវិស័យសហគ្រាសធុនមីក្រូ តូច និងមធ្យម និងវិស័យសេដ្ឋកិច្ចក្រៅប្រព័ន្ធដែលមានសហគ្រិន និងកម្លាំង ពលកម្មជាស្រ្តីមានចំនួនច្រើនលើសលប់ គឺជាតឹកតាងនៃកិច្ចខិតខំប្រឹងប្រែងនេះ។

លោកជំទាវ គង់ សូរីតា រដ្ឋលេខាធិការក្រសួងកិច្ចការនារី លើកឡើងថា រាជរដ្ឋាភិបាលនៅក្នុងនីតិកាលទី៧ នៃរដ្ឋសភា នឹងបន្តលើកកម្ពស់សមភាពយេឌ័រ និងការបង្កើតភាពអង់អាចទៅដល់ស្រ្តី និងក្មេងស្រ្តីនៅគ្រប់វិស័យជាអាទិភាព នៅក្នុងរបៀបវារៈ គោលនយោបាយ និងយុទ្ធសាស្រ្តបញ្ចាកោណដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គមដែលមានអរិយៈធម៌ខ្ពស់ ប្រកបទៅដោយសីលធម៌ សមធម៌ និងបរិយាបន្ន ដែលនៅក្នុងនោះស្រ្តីគឺជាស្នូល ។ ក្នុងន័យនេះដែរ រាជរដ្ឋាភិបាលនិងបន្តលើកកម្ពស់ សមភាពយេនឌ័រ តាមរយៈការបង្កើនការវិនិយោគយេនឌ័រ និងការបង្កើនភាពអង់អាចទៅដល់ស្រ្តីនៅក្នុងវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បីទាក់ទាញអត្ថប្រយោជន៍ពីភាគលាភយេនឌ័រ បង្ករលក្ខណៈអំណោយផលទៅដល់ស្រ្តី ក្នុង ការប្រើប្រាស់សិទ្ធលើការសម្រេចចិត្តអំពីផែនការគ្រួសារ កាត់បន្ថយភាពរងគ្រោះដោយអំពើហឹង្សាទាក់ទងទៅនឹងយេនឌ័រ ស្រ្តីនិងក្មេង ស្រ្តី ក៏ដូចជាការលើកកម្ពស់ទំនាក់ទំនងអន្តរជំនាន់ជាដើម៕

អត្ថបទ៖ សុន រ៉ាឌី